Isikole sithole uxhaso ngokuzimisela
UKUZIMISELA ekufundiseni izingane kuhehe abatshalimali ukuthi bakhe kabusha isikole esidala saKwaMashu i-EThekwini Primary esinabafundi abawu-1 244.
UNksz Gabisile Zulu onguthishomkhulu waseThekwini Primary uthe unothisha abazimisela kakhulu ukufundisa izingane yingakho lesi sikole esaqala ukusebenza ngo-1969, sisekhona namanje.
“Isikole sethu ngesinye sezikole ezindala KwaMashu ngoba saqala sinamakilasi awu-10 kodwa kuthe ngokuhamba kwesikhathi abafundi balokhu banda saze salethelwa amakilasi awomahamba nendlwana. Njengamanje isikole sethu sakhiwe kabusha yiCotton On Foundation. Sesinamakilasi awu-32 aqala kwaGrade R aphele kwaGrade 7,” kusho uNksz Zulu.
Uthe banothisha abawu32, abafundisa bonke abafundi bakulesi sikole esinobuchwepheshe besimanje, nezindawo ezinhle zokudlala.
Isiqubulo sesikole sithi, “Khanya Lapho Ukhona” okuyisona athi sigqugquzela abafundi nothisha ukuthi bazimisele ukuze baphumelele.
Phakathi kwezingqinamba abanazo, ubalule ukuthi abazali abayikhokhi ngesikhathi imali yesikole ewuR120 ngonyaka.
“Isikole sethu siwuQuantile 4, okusho ukuthi kufanele kukhokhwe imali yesikole. Siye sithole ukuthi abazali abakhokhi ngesikhathi.
“Imali yesikole iyasisiza ukuthi sikhokhele izidingo ezifana nogesi, siholele nabantu abahlanza isikole,” kusho uNksz Zulu.
Uthe noma abazali bengayikhokhi ngesikhathi imali yesikole kodwa u-60% kuya ku-70% wabo uyawuhambela umhlangano wesikole.
Abafundi baseThekwini Primary uNksz Zulu uthe bahlala ehostela KwaMashu, abanye bahlala emijondolo okuthiwa yiseQhakaza bese abanye bahlale ezindlini zomxhaso.
Isifundo abenza kahle kusona yiMathematics ngoba omunye umfundi wabo ulale indawo yesithathu emncintiswaneni weMathematics obuwenzelwe izikole zaKwaZulu-Natal.
Ngaphandle kokwenza kahle ezifundweni zasekilasini abafundi baseThekwini Primary bahamba phambili ebholeni lamantombazane nakwi-athletics.
UNksz Zulu uthe wafika eThekwini Primary ngo-1990 walokhu ethuthukisa ulwazi lwakhe enza iziqu ezihlukene, walokhu ekhushukelwa yisikhundla waze wagcina esewuthishomkhulu.
Uthe akukho okumhlulayo njengomuntu wesifazane osesikhundleni esiphezulu ngoba unamava omsebenzi awenzayo futhi usebenzisana nabantu abayithandayo impumelelo.
Ugqugquzele umphakathi ukuthi uzinakekele izikole ukuze nezinkampani ezizimele zisondele kuzo ukuzothuthukisa ingqalasizinda.
Uthe bahlangana neCotton On Foundation ngo-2015 ngesikhathi izobanikelela ngomtapowolwazi isebenzisana neNelson Mandela Foundation.
“Ngesikhathi abakwaCotton On Foundation befika esikoleni sethu babona ukuthi singabantu abakuthandayo ukufunda nokufundisa ngendlela esasibeke kahle ngayo izincwadi.
“Basibuza izingqinamba esinazo sabatshela ukuthi asinawo amakilasi anele kodwa sinesibalo esiphezulu sabafundi. Bebelokhu bexhumana nathi baze bakwazi ukusakhela isikole,” kusho uNksz Zulu.
Kudala abafundi bebempintshana emakilasini kodwa manje sebefunda ngokukhululeka, asisekho isidingo sokubhangqa amakilasi amabili egunjini elilodwa.
UNksz Zulu uthe kuyiphupho lawo wonke uthishomkhulu ukuthi isikole sakhe sibe nengqalasizinda efanele kodwa lokhu akwenzeki njalo ngoba uMnyango wezeMfundo awunayo imali eningi.
Uthe uyajabula kakhulu ngesikole esihle, esijabulisa othisha, abafundi nabazali esenza ukufunda nokufundisa kube mnandi.