Ubhoboke ngeligi yabesifazane bedla isicoco abeDowns
UMQEQESHI weqembu labesifazane leMamelodi Sundowns, uJerry Tshabalala, unesifiso sokubona iligi yabesifazane yaseNingizimu Afrika ifinyelela ezingeni lapho abadlali besifazane bezokwazi ukuziphilisa ngebhola.
UTshabalala ukusho lokhu emuva kokuhola iSundowns Ladies iba ngompetha bokuqala beSAFA National Women’s League.
ISundowns ishaye iCoal City Wizards ngo 4-1 ngempelasonto, nokusho ukuthi yize sekusele imidlalo emibili kusongwe iligi, alikho iqembu elingayifica ngamaphuzu.
Iqembu likaTshabalala alikaze lishaywe emidlalweni ewu-20. Iqembu eliza ngemuva yiTshwane University of Technology enamaphuzu awu-51.
“Into esiyidingayo abantu abangaseseka. Siyadinga ukuthi lenyuke izinga, abadlali bakwazi ukuthola amaholo. Uma ubheka abadlali abakhona, yibona ababeka isinkwa etafuleni emakhaya. Siyafisa nje ukuthi okungenani kube nomholo onqunyiwe ozotholwa ngabadlali. Lokho kungenzeka kuphela uma singathola abaxhasi,” kusho uTshabalala. Uthe ukusungulwa kwale ligi kusizile ekuthuthukiseni ibhola nasekuvezeni abadlali abaqhumuka kuzona zonke izifundazwe masonto onke.
“Kulokhu bekungadingi ukuthi kuze kube nemidlalo kazwelonke ukuthi sonke sidlale, okwenyusa izinga lokuncintisana. Ibhola labesifazane ezingeni lomhlaba liphezulu kakhulu. Thina asikho kulelo zinga ngenxa yokweswela abaxhasi.” UTshabalala ukhuluma ngelokuncintisana nje, kubukeka sengathi ezakhe azinantanga kule ligi njengoba isibhaxu kuyinto ezingayazi.
ISundowns iqede endaweni yesibili eGauteng kwiSasol Provincial League ngesizini edlule. Ingene kwiNational League ngokuba ngaphansi kweqembu elikhulu labesilisa leSundowns. Elinye iqembu elingene ngalolu hlobo yiBloemfontein Celtic
Ladies.
UTshabalala uthe akusilona iqiniso ukuthi bazigwazela ibhece emaqenjini ngoba nakhu benezinsiza ezingcono kunabanye.
“Angicabangi ukuthi lokho (ukuba yingxenye yeSundowns) kwenza umehluko. Angikholwa ukuthi sinezinsiza ezingcono ezidlula amaqembu amaNyuvesi anjengoUJ noTUT. Into ekhona wukuzimisela kwabadlali bami. Amalungiselelo eligi thina sawaqala kusathiwa iligi izoqala ngoFebhuwari (odlule). Lokhu kwenze kwafika isikhathi semidlalo sengivele ngibazi abadlali engizogadla ngabo kodwa futhi besingathembele kubantu ababodwa,” kusho uTshabalala. Lo mqeqeshi, oneCAF C License kwezokuqeqesha, akalona ivukane ekunqobeni izicoco njengoba edle izicoco zeSasol kathathu neSundowns (2013, 2015 nango-2017).