Ululekwe yinkakha eyolwela eleWBF
UZONGENA eringini kunkenteza amazwi enkakha ezindlebeni umshayisibhakela waseDundee, uGcina Makhoba, ozolwela ibhande leWorld Boxing Federation (WBF) International Junior Bantamweight ngoMgqibelo.
UMakhoba, uzongxifana noMusawenkosi Ndwandwe, waseMandeni, empini eyimpindamshaye eMajuba Dundee TVET Hall ngoMgqibelo ngo-2 ntambama. Impi izoba ngeyosuku kwezihlelwe yiStarline Boxing Promotions kaZandile Malinga ngokubambisana noMnyango weZemidlalo KwaZulu-Natal.
UMakhoba, ozolwa phambi komndeni wakhe, uthe ayamkhuthaza amazwi kaThulani “Sugarboy” Malinga owaba ngumpetha wokuqala eMzansi we-World Boxing Council (WBC).
“Leli yithuba elikhulu kimina lokulwela ibhande ngasekhaya. Kufanele noma kanjani nginqobe. Ngifisa ukuhamba ibanga elide esibhakeleni, ngiwine amabhande amakhulu njengeWBC eyawinwa nguSugarboy Malinga. Uyafika kithina azosikhuthaza ukuthi sisebenze ngokuzikhandla uma sifuna ukuphumelela esibhakeleni. Uyasitshela ukuthi ayikho inkomo yobuthongo. Lawo mazwi ahlezi kimina,”kusho uMakhoba.
UMakhoba uqale isibhakela ngo-2017. Uzongena eringini okwesikhombisa kusukela eqale isibhakela esikhokhelayo. Usahlulwe kanye, okwenzeke ekhala ngaphansi kuTheo Nxayiphi e-East London ngi-2018. Kuzohlangana umhlathi owazanayo kuMakhoba noNdwandwe kwazise batholana phezulu nyakenye ehholo laKwaMsane eMtubatuba. UMakhoba uqede ngoNdwandwe ngomzuliswano wesithathu.
“Angibuboni ubunzima kuNdwandwe. Silwile naye nyakenye, ngamshaya ngomngqimuzo womlalisa phansi ngomzuliswano wesithathu. Ngilindele ukuthi uzobuya esewalungisile amaphutha. Uma efika engajimile futhi ngizomphinda ngoba ngihlala khona ejimini,” kusho uMakhoba.
Uphromotha uMalinga uthe uMakhoba kufanele awine noma yikanjani. “UGcina kufanele awine noma yikanjani. Uzobe elwa phambi kwabazali bakhe, yizihlobo, abangani nabantu nje abamaziyo. Kufanele akhombise nalabo abebemngabaza ukuthi ufikile esibhakeleni. Okungihlaba umxhwele wukuthi leli bhande lizobangwa abashayisibhakela baKwaZulu-Natal abanikwe ithuba yiwona uMnyango weZemidlalo,” kusho uMalinga.