Izelamani zibonga uMiddendorp
ABAQEQESHI ababili bandawonye kwiPremier Soccer League (PSL) babonga bayanconcoza kumqeqeshi weKaizer Chiefs, u-Ernst Middendorp, ngokubakhulisa endimeni yezokuqeqesha.
UFadlu noMaahier Davids, abahlonishwayo endimeni yezokuqeqesha bathi ngabe abekho lapho bekhona njengamanje ukube abazange bamazi uMiddendorp.
UFadlu ugile izimanga engumqeqeshi weMaritzburg United, aqophe nayo umlando eyibeka endaweni yesine kwiPremiership kumasizini amabili adlule.
Uphinde wayifaka kowamanqamu kwiNedbank Cup ngonyaka ofanayo kodwa ngeshwa bahlulwa kowamanqamu iFree State Stars.
Ugila lezi zimanga nje neTeam Of Choice usebenzisana naye umfowabo uMaahier oyiphini lakhe.
Njengamanje uFadlu, uyiphini likaJosef Zinnbauer kwi-Orlando Pirates ezoshukana nabakhaya iKaizer Chiefs ngoMgqibelo, eFNB Stadium.
Ngakolunye uhlangothi uMaahier ungumqeqeshi weCape Umoya United, ebidonsa kanzima kwiGladAfrica Championship, kwafika yena kwaba khona uzinzo.
Engxoxweni abe nayo naleli phephandaba, uMaahier uthe uMiddendorp ungomunye wabaqeqeshi obasize kakhulu befika kule ndima benomnewabo.
“Okokuqala nje ekhaya sifundiswe ukuhlonipha. Nathi uqobo siyazihlonipha. Siyazihlonipha futhi nezitha esisuke sidlala nazo. Nomphakathi nje wonkana. Ngaphandle kwalokho sinabantu noma abaqeqeshi esibukela kubona abasisize kakhulu sisafika kule ndima,” kulandisa uMaahier.
“Njengamanje ngisebenzisana noRoger De Sa lapha kwiCape Umoya. Ngiyabukela kakhulu kuyena futhi uyangisiza. Kodwa ngeke silibale nguMiddendorp esisebenze kahle kakhulu naye eminyakeni edlule kwiMaritzburg. Empeleni namanje sisaxoxa noMiddendorp, angisize lapho engangisiza khona. Ngimfisela inhlanhla futhi kwiKaizer Chiefs ngoba ungumqeqeshi osezingeni eliphezulu kakhulu,” kuqhuba uMaahier.
Eqhubeka echaza uMaahier, uthe iNingizimu Afrika inenhlanhla enkulu yokuba khona komqeqeshi osezingeni likaMiddendorp.
“Sinenhlanhla enkulu kuleli ukuba nomqeqeshi ofana noMiddendorp. Yinqwaba abadlali abadlule esandleni sakhe abenza kahle namanje emaqenjini abawadlalelayo. Usenike ithuba abadlali abancane abangaziwa kulo lonke iqembu aliqeqeshile kuleli. Ngaphandle kwalokho uneso lokuvundulula abaqeqeshi bengakaziwa muntu, unesiphiwo esiyisimanga kulokhu,” kusho uMaahier.
Amanye amaqembu aqeqeshwe nguMiddendorp singabala iMaritzburg, Bloemfontein Celtic, Chippa United neLamontville Golden Arrows.