‘I-Chiefs mayisebenzise isijeziso seFifa’
UDERRICK Spencer ozakhele igama kwiKaizer Chiefs eminyakeni edlule, uchaza ngokumiswa kwaleli qembu yiFifa ukusayinisa abadlali njengebhadi elimnandi, elingaba nezithelo ezinhle ngokuhamba kwesikhathi.
Nakuba Amakhosi eludlulisele kwiCourt of Arbitration for Sport (CAS) udaba lwawo, lesi sitobha esiwagaxe emgibeni amakhokho ngo-2012 emuva kokudlala kwiBidvest Wits, sithe yize zizimbi lezi zindaba kodwa iChiefs kumele iziguqule, ziyisebenzele.
USpencer uthe nakuba kukubi ukuthi iChiefs uma liphinda liyilahla icala ngeke ikwazi ukusayinisa abadlali abanohlonze kumawindi amabili ezayo kodwa okuhle wukuthi lesi simo sizonika abadlali abasezinkulisa zayo ithuba lokuziveza eqenjini elikhulu.
Udaba lokumiswa kweChiefs lusuke ngomgadli waseMadagascar, u-Andriamirado “Dax” Andrianarimanana, iFifa ethe imsayinise kumasizini edlule ingalandelwanga imigudu efanele. Udaba lufakwe kwiFifa, yiFosa Juniors eveze ukuthi iChiefs yayishaya indiva ekubeni beyisenenkontileka nalo mdlali ogcine ukubonakala kwiBlack Leopards.
“Ukunyusela eqenjini elikhulu abadlali abasezinkulisa kuzoyisebemzela iChiefs ngezindlela eziningi. Okokuqala nje izokonga imali eningi ekuthengeni abadlali. Okwesibili abadlali abazonyuswa basebancane ngokweminyaka. Lokhu kusho ukuthi izodlala ngabadlali abalaziyo isiko mpilo leqembu futhi abazohlala isikhathi eside kulo. Engingayala ngakho umqeqeshi wukuthi abasebenzise impela laba asebenyusiwe ukuze bayijwayele ingcindezi yesigaba esikhulu ehlanganisa neyabalandeli,” kubeka uSpencer odlale nakwiMamelodi Sundowns.
“Uma icala liyilahla iChiefs izothwala kanzima uma igcina ngokuya kwiCAF Champions League noma kwiConfederation Cup. Laphaya kudingeka isikwati esiningi nabadlali abanamava. Nakuba mhlawumbe ingeke yenza kahle ngalaba badlali abancane ngokweminyaka, okuhle wukuthi bazothola isipiliyoni esiyisimanga, esingasiza neBafana Bafana eminyakeni ezayo.”
Lo makadebona waseShowe uthe noma kugcina ngokwenzakalani akaboni u-Arthur Zwane osezinkulisa zeChiefs ezothwala ubunzima. Uthe lo mqeqeshi adlale naye usekuvezile ukuthi uyawazi umsebenzi wakhe.
Phakathi kwasebanyusile kubalwa uSiphosakhe Ntiya-Ntiya, Nkosingiphile Ngcobo,Happy Mashiana, Njabulo Blom, ukusho abambalwa.
“Indlela enza ngayo uZwane ingikhumbuza izinhlaka ezincane zeChiefs eminyakeni edlule ezakhiqiza abadlali bezinga eliphezulu abafana noJabu Pule, Skapi Malatsi, Isaac Mabotsa, Nhlanhla Kubheka, Itumeleng Khune nabanye ababa wusizo olukhulu. Okuhle wukuthi nomqeqeshi (Ernest Middendorp) usekuvezile ukuthi akasabi lutho ngalesi simo. Unanenqwaba yabadlali ababolekiswe kwamanye amaqembu. Njengoba kuphela isizini ngicabanga ukuthi kulokhu eyokugcina neyokudedela abadlali uzoyibheka ngehlo elihlukile.”