Ukhathazekile ngezembe elilengela omkhaya

OWAYENGUMGADLI weMpumalanga Black Aces, uMpho Maleka, ukhathazekile ngezembe elilengela amaqembu angakubo eLimpopo, adlala kwi-Absa Premiership.

Womathathu amaqembu aseLimpopo, iBlack Leopards, Polokwane City neBaroka akwamane asengcupheni yokudliwa yizembe ekupheleni kwesizini ka-2019/2020. Abambene ngamaphuzu angu-20. Emsileni kuhlezi AmaZulu, okuyilona kuphela iqembu laKwaZulu-Natal elisengozini yokugawulwa yizembe.

UMaleka, owagawulwa yizembe neBlack Aces ngamasizini adlule, uthe ukwehlela ehlathini kweqembu laseLimpopo kungasibuyisela emuva isifundazwe.

“Isimo sibi kakhulu manje. Womathathu amaqembu kufanele kube khona esikwenzayo ukuze asinde ezembeni. Kudingeka abadlali babhukule, bacabange ukuthi kuzosho ukuthini ukudliwa yizembe. Ngikhuluma ngento engiyaziyo ngoba langidla izembe ne-Aces. Ngiyasazi isimo abadlali abakuso. Uma singalahlekelwa yiqembu elilodwa siyisifundazwe kungasho ukubuyela emuva. Besilwela ukunyusa elesine iqembu. Ngakho asikwazi ukulahlekelwa ngelinye,” kusho uMaleka.

Womathathu amaqembu aseLimpopo asebashintshile abaqeqeshi kule sizini. NgeSonto amabili angase ashovelane obishini uma iPolokwane isibhekene neLeopards, ePeter Mokaba Stadium ngo-3.30 ntambama. Ngaleso isikhathi iBaroka iyobe iyohlwaya amaphuzu kwiCeltic eDr Molemela Stadium, eFree State.

UMaleka uwine indebe yeMTN 8 neMoroka Swallows ngaphambi kokuthi leli qembu ligawulwe yizembe. Uphanyeke amakhokho emgibeni eseyibamba kwiBaroka ngesizini ka-2013/2014.

“Kudingeka kuhlangane wonke umuntu osebholeni eLimpopo. Kungaba abaqeqeshi, abadlali beminyaka edlule, yizikhulu nodokotela bengqondo, sihlangane sonke sithole ikhambi ngoba isimo sibi. Akusebenzi manje ukwenza into yakho uwedwa eceleni. Ukuhamba kweqembu kuzosho ukushabalala kwamaphupho kubadlali abadlala emaqenjini eMultichoice Diski Challenge (MDC) asebethembile ukuthi bazonyukela esikimini esikhulu,” kusho uMaleka.