Uphinde wahlambalaza umqeqeshi weVUT
UPHINDE wahlambalaza umqeqeshi weVaal University of Technology, uStanford Nkoana, ngesikhathi ekhishwa yiMamelodi Sundowns ayingcofe ngokuba nezitobha ezingamakhehla kwi-Last 16 yeNedbank Cup emdlalweni obungeSonto, eLucas Moripe Stadium.
UNkoana, ochazwe umqeqeshi weLamontville Golden Arrows, uSteve Komphela, njengomuntu ofuna ukuduma ngaye kulandela inkulumo ayenze ngaphambi koweLast 32 yeNedbank, ukuphindile lokho echaza iqembu likaPitso Mosimane njengelinenhlanhla futhi eliyohambe lisinda.
Lo mqeqeshi ubebuzwa ngaphambi kokudlala kwakhe ne-Arrows, impendulo yakhe ayizange ithinte lutho okumayenala nomdlalo kodwa wagxila ekunakeni ukuthi isiNgisi sikaKomphela ngeke simsize ngalutho enkundleni.
Ukuphindile lokhu ngemuva kokukhishwa yiSundowns ngo 2-0 wamagoli kaWayne Arendse (oyisitobha) noPhakamani Mahlambi obesuka ebhentshini. NgokukaNkoana, iSundowns iphunyukile.
“Ngokomdlalo ngokwami besilingana ngoba kunezikhathi lapho bebekhombisa khona ukuthi bangaphezulu kodwa nathi zikhona futhi izikhathi lapho besiba khona ngaphezulu kwabo. Okusisizile ukuthi besazi ukuthi ukuwola kwabo amakhadi emdlalweni weligi phakathi nesonto bekusho ukuthi isikimu sizoshintsha.
“Bonke laba badlali abebebafakile abayona imiqemane ngokwanele ngoba abajwayele ukudlala. Okwethu bekuwukucindezela lokho okuyinto engicabanga ukuthi izwe lonke libonile siyenza saze saya ekhefini kungu 0-0. Ngesikhathi ngihlelela lo mdlalo obekungibusa ukwazi ukuthi kuzodlala abadlali abanyiwa isikimu. Ngaphandle kokungabi nalo ijubane, iningi labo selingamakhehla,” kusho uNkoana. Lo mqeqeshi akazange athuke uReitumetse Hlongwane egeja iphenathi.
“Kuyona yonke imidlalo uhlale ewadumisa enethini ngakho bengilindele lokho. Uma umgadli onjengaye egeja iphenathi kufanele wehlise umoya ukhumbule ukuthi ibhola linjalo. Ngineme ngokuningi esikufundile kulo mdlalo futhi nginesiqiniseko sokuthi uma sesibuya ngokuzayo sizobe sesingcono kakhulu kunalokhu esiyikhona manje.”