USandilands akacacisi ngomdlalo wabakhaya
UNOZINTI we-Orlando Pirates, uWayne Sandilands, uzibophezele ekwenzeni konke okusemandleni ekutheni iqembu liphumelele.
NgoMgqibelo iPirates izobe ingosokhaya idlala neKaizer Chiefs kowabakhaya baseSoweto eFNB Stadium ngo-3.30 ntambama.
Kulindeleke izinkumbi zabalandeli njengoba amathikithi adayiswa aphela.
USandilands nguyena osephenduke isethenjwa emapalini eZimnyama. Ngaphezu kwamaphuzu amathathu amqoka azobe edlalelwa, yiPirates ilwela ukubuyisa isithunzi sayo ngemuva kokuguqa ngo 3-2 emzuliswaneni wokuqala weligi.
Lo nozinti, oseke wadlala nakwiMamelodi Sundowns, ungomunye wabadlali abangathathwa njengabadala eqenjini, nokaputeni uHappy Jele.
Lokhu kushiya kubona umsebenzi wokukhuthaza iningi labadlali bePirates abasha futhi abanye babo abasalangazelele ukunqoba izicoco zabo zokuqala.
“Ngicabanga ukuthi okusemqoka wukwenza umsebenzi enkundleni ngawo wonke amangwevu.
Iyona indlela engingakhombisa ngayo ukuba umholi leyo kunokuthi ngikwenze ngokukhuluma. Kumele ngibe yisibonelo sokuthi asikwazi ukuyeka ukulwa.
Kumele siqhubeke sicindezele, sisebenzise amathuba aqhamukayo,” kusho uSandilands.
I-Pirates ihleli endaweni yesithathu kwi-log. Ihlukaniswe ngamaphuzu ayisithupha neChiefs esesicongweni ngamaphuzu awu45.
Ngesikhathi izolo iPirates inesithangami nabezindaba okucacile wukuthi bavumelene ngokuphusha ivangeli lokuthi yona ayikho embangweni wokuba ngompetha beligi.
“Njengoba umqeqeshi (uFadlu Davids) eshilo, okwethu wukubheka umdlalo olandelayo.
Miningi imidlalo esazoba khona. Amanye amaqembu asalele ngemuva futhi sonke sisazodlala ndawonye.
Okumqoka wukubheka lokhu esikwenzayo singanaki ukuthi abanye benzani.
Kuwumsebenzi wethu badlali abadala ukukhumbuza ozakwethu ngokumele sikwenze.
Sibe yisibonelo ngokuthi sivelele ezimeni ezinzima.
“Thina sizogxila emdlalweni ozayo. Sizobona ukuthi ngemuva kwemidlalo emine ezayo siyobe sikuphi. Mhlawumbe sizobe sesicaciseleka ukuthi sizoqeda kuphi.
Okusemqoka kithina wukubuyisa isithunzi sethu ngamaphuzu amathathu emdlalweni ozayo, kulokhu esizobe siwudlala neChiefs ngoMgqibelo,” kusho uSandilands.
Lo nozinti uthe ngeke bazikhohlise ngezinkulumo esezisabalele zokuthi kulula ukuqagela indlela yokudlala yeChiefs. Imidlalo ye-Absa Premiership: NgoLwesihlanu: Maritzburg United v Stellenbosch (Harry Gwala Stadium, 8pm)
NgoMgqibelo: Lamontville Golden Arrows v Highlands Park (Sugar Ray Xulu Stadium, 3.30pm);
Orlando Pirates v Kaizer Chiefs (FNB Stadium, 3.30pm); Chippa United v AmaZulu FC (Nelson Mandela Bay Stadium, 6pm); SuperSport United v Bidvest Wits (Mbombela Stadium, 8.15pm)
NgeSonto: Polokwane City v Black Leopards (Old Peter Mokaba Stadium, 3.30pm); Bloemfontein Celtic v Baroka FC (Dr Molemela Stadium, 3.30pm)