Ezekhethelo lodwa ngowomkhaya
NGOMGQIBELO kuzobe kugujwa ngokusemthethweni iminyaka engu-50 kusukela kwadlalwa umdlalo wokuqala ngqa womkhaya baseSoweto, iKaizer Chiefs ne-Orlando Pirates. Inhlangano yezokusakaza, iSuperSport ikhipha unyawo kuleli sonto ihlangabeza lo mdlalo.
La maqembu azohlangana ahlukane eFNB Stadium, eSoweto ngoMgqibelo ngo-3.30 ntambama.
Kubangwa amaphuzu amathathu azoba nomthelela omkhulu ekunqotshweni kwesicoco se-Absa Premiership.
La maqembu alandelana endaweni yokuqala (Chiefs) neyesithathu (Pirates) ahlukaniswe yiMamelodi Sundowns eyisibili. IPirates ibisizenzele kwiChiefs kusuka ngo-2014 kodwa ngoNovemba nyakenye Amakhosi azibuyisile izinduku emdlalweni ophele unamagoli amahlanu.
Akusikho nje ukugubha iminyaka engu-50 kodwa kuzobe kuyimpi yomkhaya yokuqala kuleli khulunyaka.
Kusuka izolo iSuperSport inezinhlelo ezithinta lo mdlalo, ohlelweni oluyisipesheli olubizwa nge-A Rivalry, olushayelwa nguSizwe Mabena. Namuhla ngo-8 ebusuku kwiSS4 uMabena uzobe eno-Innocent Mayoyo, Steve Lekoelea noWilliam Shongwe owadlalela womabili la maqembu.
Ngo-1 emini namuhla kodwa kuzoqala kube nesithangami sabezindaba esizosakazwa bukhoma kwiSS4 nakwiSSBlitz.
Kusasa ngo-5.30 kuyo iSS4, uMabena noShongwe bazobe benezilomo zePirates, uGabadinho Mhango noThembinkosi Lorch kanjalo nezeChiefs, uSamir Nurkovic noKhama Billiat.
Abalandeli bazothola ithuba lokubeka olwabo uvo kwiFanbase ngo-7 ebusuku. Ngosuku lomdlalo uCarol Tshabalala noPhumlani Msibi babe benoStanton Fredericks noJimmy Tau abadlalele womabili la maqembu noSimphiwe Dludlu ongumqeqeshi wesikwati sikaUnder 17 samantombazane.
Ngosuku lomdlalo azobe engu25 amakhamera akwaSuperSport enkundleni, kuzobe kubhabhaza nebhanoyi elinophephela emhlane.
UNurkovic noMhango yibo abathwele amathemba amagoli kwazise babalwa kubashayimagoli abahamba phambili kule sizini.
UNurkovic unangu-11 kuthi uMhango abe nangu-14.