I-Nedbank ingase ithathwe amaqembu okuthiwa mancane
UMQHUDELWANO webhola waminyaka yonke obandakanya amaqembu awu-32 aseNingizimu Afrika, iNedbank Cup, sewukucacise kaningi ukuthi awuwathandi amaqembu athathwa njengamakhulu kuleli.
Umlando walo mqhudelwano ukhombisa ukuthi amaqembu amakhulu asheshe awashiswe ijezi yilawo athathwa njengamancane. Njengoba sekuzodlala imidlalo yama-quarterfinal kulo mqhudelwano, iqembu elisasele elithathwa njengelikhulu, yiMamelodi Sundonws. I-Orlando Pirates iphume kwiLast 32, kwathi iKaizer Chiefs yawashiswa ijezi ngempelasonto kwiLast 16.
Nangesizini edlule kwenzeka okwakungalindelekile ngesikhathi iChiefs ishaywa yiTS Galaxy ngo 1-0 kowamanqamu weNedbank Cup, eMoses Mabhida Stadium, eThekwini.
Akekho noyedwa owayelindele ukuthi iChiefs iphoxwe yiGalaxy egijima kwiGladAfrica Championship.
Akungangabazeki ukuthi abeNedbank sebebambe umoya ukuthi iSundowns ingazitholi ikhishwa kulo mqhudelwano njengoba sekuyilona lodwa iqembu elingazama ukuheha abalandeli ababonakalayo enkundleni.
Eminyakeni edlule amaqemu afana neBaroka FC, University of Pretoria, Maluti FET College FC, amangaza abalandeli eshaya izinkunzi zaseSoweto kulo mqhudelwano. Empeleni iChiefs nePirates sekunesikhathi eside bagcina ukuqukula le ndebe.
Ukuphuma kweSundowns kulo mqhudelwano kungaba yizindaba ezimbi kwabeNedbank abavele sebegqemeke engeqiwa ntwala ngokuphuma kwePirates neChiefs. La maqembu aseSoweto sekumele azibambe ziqine emidlalweni ye-Absa Premiership ngoba yiyona yodwa indebe anethuba lokuyinqoba kule sizini.
AmaBhakabhaka naMakhosi bazogijimisana kube kuncane indawo emdlalweni weligi eFNB Stadium, ngoMgqibelo ngo-3.30 ntambama. Abaningi bakholwa wukuthi iqembu elizowina lapha yilona elizozibeka ethubeni elingcono lokuwina isicoco seligi.
OkweNedbank kona kubukeka kuyinto eyimpicabadala kakhulu ngoba amaqembu athathwa njengamakhulu abukeka engenayo inhlanhla kulo mqhudelwano. Maningi amathuba okuthi owamanqamu udlalwe ngamaqembu athathwa njengamancane kulokhu.