I-Transnet iqophe umlando ihambisa izithelo eziningi
I-TRANSNET Port Terminals iqophe umlando ngokuhambisa ama-grebhisi, amajikijolo nama-plums agcwele iziqukathi eziwu-1 665 e-Europe.
Iziqukathi zihambe ngomkhumbi iSanta Clara wakwaMaersk.
Phambilini iTransnet Port Terminals yayihambise izithelo ngeziqukathi eziwu-1 200.
Zonke iziqukathi zisuke eCape Town Container Terminal kungekudala.
“Iziqukathi ezinamafriji ezaziwa ngama-Reefer zahamba ngo-Okthoba kuya ku-Ephreli futhi zibalulekile emnothweni wezwe ngoba zihambisa izithelo ezehlukene emazweni omhlaba,” kusho uMnuz Oscar Boschards oyibamba lemenenja yechweba.
UBoschards uthe irekhodi labo elisha libalulekile ngoba likhombisa ukuthi ithimba lakhe liyasebenza.
Uveze ukuthi izithelo kufanele zihanjiswe ngesikhathi esifanele.
“Ngesikhathi silayisha iziqukathi bekunomoya onamandla obuzosiphazamisa kodwa ithimba lethu lenza isiqiniseko sokuthi lisebenza ngobuchule libambisene nekhasimende,” kusho iKHASI ELIKHOKHELWE uBoschards.
Ngonyaka uthe bahambisa amaReefer awu-180 000. Isibalo sinyuke ngo-615 uma beqhathanisa no-395 wangonyaka odlule.
Uthe ezolimo zibalulekile eNingizimu Afrika futhi kubalulekile ukuthi uhulumeni axhase abalimi abakhulu nalabo abasafufusa.
UMnuz Mohammed Mahomedy oyisikhulu esiphezulu esisabambile eTransnet, uthe ukukhula kwesibalo samaReefer athunyelwe phesheya kuhambisana nohlelo lwabo lokuthuthukisa inkampani nomnotho waseNingizimu Afrika.
Uthe ukubambisana nezinhlaka ezithintekayo abale kuzo abalimi bamagrebhisi nabakwaMaersk kwenza umsebenzi wabo ube lula.