Oxoshwe yi-Eagles usebonakale eqenjini le-ABC Motsepe
UVUMBUKE kwi-ABC Motsepe League uDada Sibiya oxoshiwe ngenyanga edlule yiRoyal Eagles eyibamba kwiGladAfrica Championship.
Leli phephandaba lithole ukuthi uSibiya uqale umsebenzi kwiGWP Friends ngoMsombuluko. Kuvela ukuthi uCloud Tarin, obeyinhloko yabaqeqeshi wehliselwe kwesokuba yiphini.
USibiya, onoLevel 2 Licence wokuqeqesha, akamusha kwi-ABC Motsepe League njengoba eke waqeqesha iHappy Wanderers, avule ngayo izolo, Ashley nakwiKwaDabeka Sporting ngaphambi kokuthi ajoyine i-Eagles.
UDada uqashwe emuva kokuba iFriends ibambane ngo 1-1 ne-Edendale Juventus amaqembu azenzelayo kuyo. Emsileni iJuventus ibambene neZululand Warriors ngamaphuzu awu-14 emuva kwemidlalo ewu-21.
Kuthintwa uJomo Ndumo, imenenja yeFriends, ukuqinisekisile ukuthi uDada usekubona.
“Kusithokozisa kakhulu ukujoyinwa wumqeqeshi onamava onjengoDada. Sethemba ukuthi ukufika kwakhe kuzoletha olukhulu ushintsho eqenjini. Uzolekelelwa wuTarin, obevele ekhona,” kubeka uNdumo.
Lesi sikhulu siveze ukuthi basayinise uBrendon oyiwele likaBrandon Parusnath, odlala kwiLamontville Golden Arrows. Naye uBrendon uke wadlala kuleli qembu likaMato Madlala. Omunye athe usayine kwiFriends, wuDoven Gordon, oke wadlalela iqembu lesizwe lakuleli leFutsal.
I-Friends isendaweni yesihlanu ngamaphuzu awu-35 emuva kwemidlalo ewu-20. NgoMgqibelo idlala neWarriors kozoqala ngo-12 emini ekhaya eWorkington Ground.
UNdumo uveze nokuthi abakalilahli ithemba ngesicoco seligi. Uthe imidlalo yabo emihlanu elandelayo yiyona ezobacacisela okuningi. Imidlalo ye-ABC Motsepe League: NgoMgqibelo, ngo-12 emini: Friends v Zululand Warriors (Workingtong). Ngo-1: Movers v Rainham Sporting (FNB Wadley Stadium). Ngo-3 ntambama: Umvoti v Natal United (King Edward Park); Muzi King Masters v Qwabe United (Ngcedomhlophe Stadium); Summerfield v Milford (Umhlathuze Sports Complex); Wanderers v XI Experience (South Coast Academy); Juventus v Durban FC (Wadley). NgeSonto: Natal Rich Boys v KwaDabeka Sporting (KwaMsane Sports Ground).