IBucs isaphika eyokulwela isicoco
KUDELA owaziyo ukuthi i-Orlando Pirates izama ukukhohlisa bani njengoba ingakhathali ukushaya ngoshuni owodwa wokuzihlangula njengelinye lamaqembu asembangweni we-Absa Premiership.
Lokhu kugqame ngesikhathi kunesithangami nabezindaba ngoLwesibili lapho leli qembu belilandisa ngamalungiselelo omdlalo wabakhaya baseSoweto ongempelasonto.
I-Pirates neKaizer Chiefs abahlukaniswe amaphuzu ayisithupha kwi-log ye-Absa Premiership, bazobhekana ngoMgqibelo eFNB Stadium ngo-3.30 ntambama.
AmaBhakabhaka angemuva ngamaphuzu ayisithupha kwiChiefs esesicongweni ngawu45.
Okwenza abanye babone iPirates isizibeke ethubeni lokunqoba isicoco, yindlela eshaya ngayo ngaphansi komqeqeshi omusha, uJosef Zinnbauer. Selokhu kufike lo mqeqeshi odabuka eGermany ngoDisemba, iBucs ayiyazi induku kwiligi.
Njengoba sekusele imidlalo eyisishiyagalolunye kusongwe iligi, izibalo ziyayivuma ukuthi ingayiphakamisa indebe ekupheleni kwesizini uma amaqembu angaphezulu kwayo, iChiefs neMamelodi Sundowns bengaqhuzuka endleleni.
Kodwa okucacile wukuthi ekhempini yeZimnyama bayihlaba bayayihlikiza eyokuthi bangene shi embangweni weligi.
Kuzokhumbuleka ukuthi leli yivangeli abebelishumayela nangesizini edlule ngaphansi kukaMilutin Sredojevic, ngisho sekucacela ingane encane ukuthi iPirates isethubeni lokudla isicoco. Ekugcineni ligcine liphunyukile lelo thuba, yaqeda endaweni yesibili ngemuva kweSundowns.
Libuzwa iphini lomqeqeshi kwiPirates, uFadlu Davids ngobumqoka bokuwina kwiChiefs, ikakhulukazi njengoba lo mdlalo ungasho lukhulu ngombango wesicoco, lithe: “Asiwubhekile (umdlalo) njengowomjaho wesicoco. Umjaho oweKaizer Chiefs, Sundowns neBidvest Wits. Kusukela umqeqeshi omusha efikile okwethu wukubhekana nomdlalo ngamunye.”
Ukaputeni wePirates, uHappy
Jele naye umile kwelokuthi bona abangene kwababanga isicoco.
“Asikho embangweni wesicoco. Ezinyangeni ezimbili ezedlule besingemuva ngamaphuzu awu-19. Manje sesisembangweni wesicoco? Akukwazi. Uma ubheka abanye basemuva ngemidlalo basangawathola amaphuzu. Ngakho okwethu wukuqeda endaweni engcono ekupheleni kwesizini. Kodwa kule mpelasonto sidinga ukuthola amaphuzu amathathu,” kusho uJele.
Uma iPirates iphika eyokuqeda endaweni yokuqala, okusho ukuthatha isicoco seligi, kusho ukuthi indawo engcono abakhuluma ngayo indawo yesibili, okungaba okwesibili beyithola amasizini elandelana.
Akucaci ukuthi ngabe lokhu yikhona okudingwa abalandeli osekuphele amasizini amane belangazelele ukubona iqembu liphakamisa indebe?
NjengeChiefs iPirates isiphumile kwiNedbank, iligi wukuphela kwendebe abasenethuba lokuyinqoba kule sizini.