Ufuna kudume indawo yakubo ngeWBF
UMSHAYISIBHAKELA waseMandeni, uMsawenkosi Ndwandwe, unesifiso sokuphakamisa indawo yangakubo ngokuwina ibhande leWorld Boxing Federation (WBF) International Junior Bantamweight ngoMgqibelo.
UNdwandwe (7-2-0) waseManda Farm, uzoxhimfana noMakhoba (411) ongumfana wendawo empini eyimpindamshaye, ezoba seMajuba Dundee TVET College ngoMgqibelo kusukela ngo-2 ntambama.
Impi yabo izoba ngeyosuku kwezihlelwe nguZandile Malinga weStarline Boxing Promotions, ebambisene noMnyango weZemidlalo KwaZulu-Natal.
“Ngiyalifuna leli bhande. Ngifuna ukuphakamisa indawo yangakithi ngoba ayinakiwe kwezemidlalo.
Ukuliwina kuzoba yinto enkulu kimina nakwenye intsha ekwezemidlalo, ezobuyelwa yithemba. Ngaphezu kwalokho lizongivulela indlela ebheke ekuwineni ibhande lomhlaba, okuyilona engilifunayo,”kusho uNdwandwe oqeqeshwa nguSimangenduku Magwaza.
UNdwandwe uzongena eringini okuka-10 kusukela eqale isibhakela ngo-2014. Akakaze alilwele ibhande. Ungomunye wabashayisibhakela okubhekwe lukhulu kubona kulesi sifundazwe.
Kubashayisibhakela ababili abangcolise irekhodi lakhe ebeliza kahle, kukhona noMakhoba omehlule ngomngqimuzo womlalisa phansi nyakenye, empini ebiKwaMsane eMtubatuba.
UMakhoba usevele ukushilo ukuthi uma uNdwandwe ezophinda amaphutha anyakenye, impi izophela abantu bengakahlali phansi.
“Ngiyazi ukuthi uzoza ngomqondo wokuthi ungihlulile nyakenye. Kodwa uzofica okuhluke kakhulu kulokhu.
Amaphutha sengiwalungisile. Nyakenye bengimxina kodwa wangishaya esiswini kanzima, kwaba wukuphela kwami,”kusho uNdwandwe.
“Ngiyazi ukuthi nakulokhu uzoqala ngesivuvu ngoba ulwa ngakubo futhi bonke abalandeli abakhe bazobe bekhona. Ngeke ngilibone elidlalayo emzuliswaneni emibili yokuqala ngoba unamandla. Kodwa ngizobekezela, ekugcineni ngizonqoba.”
Kwenye impi ebhekwe ngabomvu, uSithembiso Maduna uzobhekana noMziwodumo Magxilana waseGauteng, kweyemizuliswano eyisishiyagalombili. Kungenwa bhusende.