Uqhamuke nelinye isu umsiki wengqephu
UKUTHUNGA ingqephu egqokwa emicimbini kumlahlekisele ngemali uSlungile Mokoena weHouse of Sluvin Designs kwazise iCovid-19 iye yalivala thaqa izwe kwamiswa yonke imicimbi.
USlungile utshele Isolezwe ukuthi ubone kungcono ukwenza izifonyo kulesi sikhathi ngoba noma ngabe isimo sibi kanjani kuhlezi kukhona amathuba.
“ICovid-19 isiphazamisile ngoba ama-oda ethu emicimbi emikhulu ahoxile, salahlekelwa yimali. Siye sithungele osaziwayo nabantu abahlukene uma beya emicimbini, sithunga nempahla egqokwa abathweswa iziqu, abashadayo neminye imicimbi. Konke lokhu kuye kwama ngesikhathi sikathaqa saqala ukwenza izifonyo ngoba yizona ezidingekayo,” kusho uSlungile.
Izimpahla zeHouse of Sluvin Designs zitholakala esitolo sabo esisenkabeni yeTheku kanti njengoba izwe belivaliwe uSlungile uthe bancane abantu abebebefika esitolo sakhe.
“Kuphoqeleke ukuthi ngiqale uhlelo lokudayisa izifonyo emgwaqweni kodwa ngahlangabezana nezingqinamba ngoba amaphoyisa kamasipala abengibopha athi anginayo imvume. Uma ngiyoyicela bekuthiwa inikwa abadayisa imifino nezithelo. Ngigcine sengizikhangisa ezinkundleni zokuxhumana ukuthi ngidayisa izifonyo ngenxa yalezi zingqinamba,” kusho uSlungile.
Uthe uqashe abasebenzi abahlanu kanti ngesikhathi izwe livalwe ngokwesigaba sesihlanu uqashe abanye ababili ukuze bamdayisele izifonyo emgwaqweni.
Le ntokazi ithe yize iCovid-19 iyilahlekisele ngemali kodwa isazoqhubeka nokusebenza noma sesinqotshiwe lesi sifo.
“Angithi uma kunesimo esibi njengeCovid-19 uyaphoqeleka ukuthi ubheke ibhizinisi lakho, uzibuze ukuthi yini engingayenza kangcono. Mina ngiqale ngokuthunga izimpahla ezigqokwa nsuku zonke ukuze ngibe nemali kulesi sikhathi. Abantu abagcini ngokuthenga izifonyo kodwa bazoyithola nempahla efudumele nokunye abangakugqoka noma nini,” kusho uSlungile.
Uphethe ngokuthi abantu bazohlale bezidinga izimpahla ngakho naye uzoqhubeka nokusebenza yize umkhakha akuwo unezingqinamba.