Uthathwe yisifo senhliziyo umculi wegqom’
UTHATHWE yisifo senhliziyo nokuthiwa besimhlupha kusukela ekhula umculi wegqom’, uNjabulo “Biggie” Zondi oshone ngoLwesibili ebusuku.
UBiggie (29) waKwaMashu ushonele esibhedlela iKing Edward eThekwini, lapho angeniswa khona maphakathi nenyanga edlule.
Unina omdala wakhe, uZanele Zondi uthe uBiggie ukhule enenkinga yenhliziyo.
“Ubephila naso lesi sifo elwa naso, omunye umuntu ngabe kade afa. Ubewumuntu obengenampilo kusukela eneminyaka eyisithupha. Ubephuma engena esibhedlela mhlawumbe nomzimba ubunomthelela,” kuchaza uZanele.
Uthe ubewumuntu obemazi uNkulunkulu ngoba ubengalali engathandazanga kwesinye isikhathi bamuzwe ecula izingoma zowokholo, entathakusa.
UBiggie uzakhele udumo ngezingoma okubalwa kuzo ethi Obaleka ayenza noDJ Websta neyakhe ethi Lokishi Lami.
“Ukungena kwakhe emculweni kwasijabulisa kakhulu njengomndeni ngoba umkhulu uZondi wayenza indlamu. Sasibona sengathi uvuse into yasekhaya. Besiziqhenya ngaye,” kusho uZanele.
Umngani wakhe omkhulu uDladla Mshunqisi, obekubo kwaBiggie ngesikhathi leli phephandaba lihambele khona izolo emini, uthe kubethusile ukushona kwakhe.
“Inhliziyo bekuyinto ebimhlupha futhi besingalindele ukuthi ngokungena kwakhe esibhedlela usezoshona ngoba ubengena, aphume. Besilokhu sixhumana, bethi uyancenga kwaze kwaba uMsombuluko, sebethi asize esibhedlela ngoba usesegunjini labagula kakhulu futhi usephefumula ngomshini. Bese kukhona nezinye izicubu zomzimba ezingasasebenzi. Sithe sibuyela ekhaya kubo siyothandaza njengoba besenza kusukela engene esibhedlela, sathola ucingo ngabo-8 kuthiwa akasekho,” kusho uDladla, nobekubonakala ukuthi uphatheke kabi.
Uchaze uBiggie njengomuntu wabantu futhi nobethanda umculo.
“Besihlale sikhuluma ngokuthi kumele kube khona umsebenzi esiwenza ndawonye kodwa kwagcina kungenzekanga.”
Umphathi weCharlie Communications, lapho uBiggie abesebenza kuyo, uNgcebo Mdima, uthe bebenethemba lokuthi umculo wakhe uzosabalala umhlaba wonke.
“Ubengicelile ukusebenza nami ngoFebhuwari ngavuma ngoba ngiyamthanda sabe sesenza ingoma yakhe. Sishuthe nevideo ngoMashi yangena kuthelevishini. Benginethemba lokuthi uzophumelela futhi angabheki ukuncintisana namuntu,” kusho uNgcebo.
Uthe akazisoli ukusebenza naye ngoba uyathanda ukusiza abantu.