Ithemba lokuthi zizoqala ukusebenza izitimela eKZN
KULOKOZA inhlansi yethemba ngokuhamba kwezitimela KwaZulu-Natal emuva kokuthi uNgqongqoshe wezokuThutha, uMnuz Bheki Ntuli, neMeya yeTheku, uMnuz Mxolisi Kaunda, izolo behlole ukuthi amalungiselelo asehambe afika kuphi.
AbePassenger Rail Agency South Africa (Prasa), ebhekelele izitimela, bathe konke kumi ngomumo kodwa balinde umyalelo kazwelonke ngosuku lokuqala ukusebenza kwezitimela KwaZulu-Natal.
Izitimela zavunyelwe ukusebenza esigabeni sesithathu somvalelandlini kodwa okwamanje ezisebenzayo ezaseGauteng, Western Cape nezase-Eastern Cape.
Uma izitimela zaKwaZulu-Natal seziqala ukusebenza kulindeleke ukuthi kuvulwe olayini ababili – owaseMlaza nowaKwaMashu, okuzoba yiziteshi zezitimela eziwu-21 kweziwu-102 zaKwaZuluNatal. UNtuli uthe bayaxoxa nabakwaPrasa ngezinhlelo zokuthi kuqale ukusebenza kwezitimela.
Uthe wanelisekile ngakubonile ngoba kuzolandelwa yimigomo yokuthi abantu bangasondelani ezitimeleni noma bame emigqeni.
IPrasa izofaka abantu abawu300 abazoqinisekisa ukuthi imithetho yokuphepha yeCovid-19 iyalandelwa.
“Kubalulekile ukuthi silandele imithetho yeCovid-19 kwezokuthutha. Kuyasikhathaza ukwebiwa kwezinsiza kusebenza nengqalasizinda eziteshini zezitimela. Lokhu kuholele ekutheni izitimela zingaqali ukuhamba KwaZulu-Natal njengoba kwenzekile kwezinye izifundazwe. Uma izitimela sezisebenza zizogibelisa u-30% wabantu ngeke zigcwale,” kusho uNtuli.
Ubonge abagibeli ngokubekezela kwabo ngesikhathi izitimela zisamile, wacela ukuthi balandele izinhlelo zokuphepha uma izitimela sezisebenza.