Bafuna ukulungisa izinkinga ezikomasipala
ISIKHUNGO esimele izimenenja zomasipala eNingizimu Afrika i-Institute for Local Government Management of South Africa (ILGM) sesifake isicelo somhlangano ophuthumayo wokulwa nezinkinga ezikhungethe abasebenzi bomasipala. Umengameli omusha oqokwe ngoMashi uMnuz Max Mbili ophinde abe yimenenja kaMasipala iRay Nkonyeni uthe sebecele umhlangano ophuthumayo nongqongqoshe wemiSebenzi kaHulumeni uMnuz Senzo Mchunu, ungqongqoshe kazwelonke wezokuBusa ngokuBambisana neziNdaba zoMdabu uDkt Nkosazana Dlamini Zuma neSalga emele omasipala.
UMbili uthe njengoba bewu257 omasipala abababhekele eNingizimu Afrika nezinkinga zakhona ziningi kakhulu kodwa babeke phambili izinto eziyisishiyagalolunye abazoqala ngazo. Phakathi kwazo kubalwa indlela okuqashwa ngayo izimenenja ezincane ezibika kwizimenenja zomasipala, izinkontileka zezimenenja neholo elincike kwinhlolokhono yesivivinyo esibhalwa uma kuzoqashwa umuntu.
Umhlangano nalabo ngqongqoshe uzobe ugxile kakhulu kulesi sivivinyo.
“Inhloso yethu ukucija amakhono ezimenenja ukuze zenze kahle imsebenzi bese omasipala beba namandla okusabalalisa intuthuko ngendlela. Yingakho silwela ukuthi kuqashwe abantu abafanele esikhundleni ukuze noma beqashwa bacijwe phezu kwamakhono esebenawo. Mayelana nokubhalwa kwesivivinyo, asinayo inkinga kodwa sithi akungasetshenziswa imiphumela yomuntu ukubeka iholo lakhe. Isivivinyo esokubheka ukuthi angalekelelwa kuphi ukucija ikhono lakhe. Sesiwucelile umhlangano neSalga nongqongqoshe kodwa kusathikameza uthaqa,” kusho uMbili.
Eqhuba uthe inkontileka yezimenenja zomasipala ngenye yezinto abafuna zishintshwe maduze. “Imenenja kamasipala inikezwa iminyaka emihlanu, emibili iphele isazijwayeza indlela yokusebenza kumasipala. Eminyakeni emithathu isuke seyinezinhlelo eziningi ezibalulekile kodwa iphele inkontileka ingakaqedi. Yingakho sifuna kube iminyaka eyishumi manje. Bese izimenenja ezibika kwizimenenja zomasipala ziqashwe ngokugcwele,” kusho uMbili.
Ephetha uthe kule minyaka emihlanu ezobe ekulesi sikhundla kuningi akuphathisiwe nokukhonjwe njengezinto ezibuyisela omasipala emuva. Inhloso enkulu yabo ukuqeda lezi zinkinga ngokushesha ukuze kwenyuke nezinga lentuthuko emphakathini.