Zihlehlisiwe izingqungquthela ze-ANC
I-ANC inqume ukuthi izihlehlise zonke izingqungquthela zayo obekumele zibe kulo nyaka emva kokubheduka kweCorona.
Esithangamini nabezindaba izolo ngemuva komhlangano wezinsuku ezimbili wesigungu esiphezulu i-National Executive Committee (NEC), uNobhala-jikelele we-ANC uMnuz Ace Magashule uthe ingqungquthela yokubuyekeza imigomo obekuhlelwe ukuthi ibingenyanga edlule, eyezifunda nemihlangano yamagatsha (BGMs), kuhlehlisiwe.
“Azikho izingqungquthela ezizoba khona kuze kube siyamemezela ukuthi zizoqhubeka,” kusho uMagashule
Lokhu kusho ukuthi nengqungquthela ebibhekwe ngabomvu yaseThekwini, ngeke isaqhubeka njengoba bekulindelwe. UMagashule uthe ayikho ngisho imihlangano emagatsheni okumele iqhubeke ngalesi sikhathi sobhubhane lweCorona.
Uthe olunye odaba abakhulume ngalo kakhulu isihlava sokuhlukunyezwa kwabesifazane nezingane.
“Njenge-NEC sithathe isinqumo sokuthi sinxuse izinhlaka zethu ukuba zihole imikhankaso yokulwa nesihlava sokuhlukunyezwa kwabesifazane nezingane,” kusho uMagashule.
Uthe bayasamukela futhi isiphakamiso sokuthi kubuyekezwe indaba yezigwebo ezinikwa abantu abasuke belahlwe ngamacala okuhlukunyezwa kwabesifazane nezingane.
“Lokhu kufaka nendaba yokunikeza ibheyili kubantu abasuke bebekwe amacala okuhlukumeza,” kusho uMagashule.
Uthe olunye udaba abalubheke kakhulu ukusetshenziswa ngokweqile kophuzo oludakayo.
“Izinkomba ziveza ukuthi kwehla kancane ubugebengu nezinye izigameko ngesikhathi kusavalwe utshwala,” kusho uMagashule.
Uthe bavumelane ngokuthi kube nohlelo olunzula lukuzama ukuvuselela umnotho wezwe oshayekile ngenxa yeCorona. Uqhube wathi kumele kusheshiswe futhi nohlelo lokusungula ibhange lasePosini nebhange lombuso.
“I-ANC iyayamukela imizamo yokuvuselela amabhizinisi kahulumeni. Sikhathazekile ngokuhlongozwa kokudiliza abasebenzi kwamanye amabhizinisi kahulumeni,” kusho yena.
Uthe bayayiseka nemizamo yoMnyango wazokuBusa ngokuBambisana neziNdaba zoMdabu kuleli yokutakula omasipala abangenzi kahle.