Ukungakhokheli izidingo kunomthelela omubi kumasipala
KUYIQINISO elingephikwe ukuthi umnotho emhlabeni wonke jikelele, ukhahlamezeke kakhulu kulandela ukubheduka kobhubhane lwesifo iCorona.
Izwe lakithi alisindanga kulolu bhubhane njengoba amadolobhakazi alo nokuyiwona ayizizinda zezomnotho, kumanje ezikhotha amanxeba.
ITheku lingelinye lala madolobhakazi ezweni agqemeke udume lwengozi, futhi izinkomba zithi lesi simo asikezudamba maduzane.
Lokhu kukhomba ngokusobala ukuthi kufanele ngokuphuthuma, sakhe izinhlaka zokuthi isimo sisibuyisele kwesejwayelekile, kwazise imithetho eyengamele ukuvalwa kwezwe, isixegiswe yafinyelela esigabeni sesithathu.
Ngokujwayelekile iTheku lifaka 10% emkhiqizweni wezinto ezenziwe ngaphakathi kwezwe, phecelezi iGross Domestic Product (GDP).
Kulandela ukuvala kwezwe, ucwaningo lwethu lukhomba ukuthi igalelo lethu kwiGDP, lingehla ngo-6%. Siyikhaya lechweba elikhulukazi e-Afrika, eligcina impahla ngisho neyamazwe angomakhelwane. Kungiphathe kabuhlungu ukubona yonke into ime nse echwebeni lethu nokuholele ekutheni ibe miningi imikhumbi ebilinde olwandle lwethu, ukuthulula nokulayisha impahla. Izimboni eziningi, bezivalwe thaqa, ngingasayikhulumi eyamahhotela nezindawo zokudlela ezilahlekelwe yimali eyevile kuR4 billion.
Embonini yezokuvakasha, kukhalwa ezimathonsi futhi kuyothatha isikhathi ukuthi isimo sibuyele kwesejwayelekile. Ayikhulunywa eyalaba abebesebenza kule mboni abamindeni yabo kumanje ilala ingadlile.
Ukungabibikho kweComrades ngokunjalo neVodacom July nonyaka, kusilimaze kakhulu njengoba amahhotela ethu aye agcwale phama kuthi abavakashile bachithe eningi imali bethenga ezitolo, kwabadayisa emigwaqweni njalo-njalo. Ngakolunye uhlangothi itshe limi ngothi e-Inkosi Albert Luthuli Convention Centre (ICC) ekuphoqeleke ukuthi kwesulwe yonke imicimbi ebizobanjelwa lapha, okuholele ekutheni ilahlekelwe yimali ethi mayicele kuR100 million.
Nase-Ushaka Marine World naseMoses Mabhida Stadium, kube yiso leso. Lokhu kuvule omkhulu umgodi enqolobaneni yethu yezimali, njengoba futhi lehlile nezinga lokuthengwa kukagesi, amanzi nokunye esikuhlinzekayo.
Izakhamuzi nazo azikwazanga ukuthi zikhokhele izidingo kwazise bekuvalwe yonke into ekubeni abanye bethu belahlekelwe yimisebenzi. Yingakho selokhu kwavalwa izwe, sesilahlekelwe imali enguR1,5 billion.
Lokhu akukaze kwenzeke phambilini yingakho kumanje sicela kuwo wonke amakhasimende ethu ukuthi akhokhele lezi zidingo. Yebo sikuqonda kahle kamhlophe ukuthi baningi phakathi kwethu abalahlekelwe yimali kodwa futhi siyazi bakhona abanawo amandla okukhokha, asebeqome ukuthi bangazihluphi ngokukhokha. Lokhu kuyingozi ngoba umasipala wethu ukuze ukwazi ukusihlinzeka ngalezi zidingo, kufanele usebenzise imali. Ukungakhokhi kwethu kuzokwenza ukuthi kube umqansa nakuwo ukuthi ahlangabezane nezidingo zethu.
Siwubuholi, siyalele inhloko yezezimali ukuthi amathimba afunda amameter, awaphume inqina ngothi lwawo, ukuyothola imininingwane ngamanzi nogesi osusetshenziswe ngamakhasimende ethu, khona sokwazi ukuthi wonke umuntu ukhokhela into ayisebenzisile hhayi elinganiswayo.
Lokhu kulandela izikhalo zamakhasimende ethu mayelana nokuthunyelelwa izikweletu ezingasuselwa ekufundweni kwamamitha.
Ngakho akukho khasimende elizovalelwa ugesi noma amanzi ngaphandle kokuthi sithole imininingwane mayelana nomthamo kagesi namanzi asetshenzisiwe ngenyanga. Asikuqonde ukuthi kuqala ukuvalwa kweze umkhandlu wathatha isinqumo sokuthi akungabi bikho muntu ovalelwa izidingonqangi. Lesi nqumo-ke siphelelwe isikhathi ngoLwesibili mhlaka-30 Juni.
Sithanda ukugcizelela ukuthi ayikho into esijabulisayo ngokuthi labo abangakhokhile bavalelwe amanzi nogesi kodwa isimo siyaphoqa ngoba nathi sisebenzisa ebomvu imali ukuthenga ugesi namanzi futhi ngokomthetho kufanele sihlinzeke umphakathi ngalokhu ngaso sonke isikhathi. Okunye okufakazela ukuthi singumasipala onakekelayo, ukuthi simemezele ukuthi ngesikhathi kuvalwe izwe, akukho muntu okuzodingeka ukuthi akhokhe imali yokusalela emumva ngesikweletu phecelezi i-interest. Sase sithi isikweletu sakho uma ungakhokhanga ngesikhathi sika thaqa, kofanele sibe sidala ngezinsuku ezingu-90 kuya phezulu. Ungakhokha isigamu sesikweletu ebese esele, senze isivumelwano uyikhokhe izinyanga ezingu-24. Sathi-ke u 50% wale mali kofanele ube usuyikhokhile ngaphambi komhla ka-30 Juni kodwake ngoba siwuMasipala onakekelayo, lesi sikhathi seselulelwe uDisemba 31, 2020. Yonke imininingwane ngalokhu ikhona kuwowonke amahhovisi ethu amanye esiwabiza ngaboSizakala Centres. Ngakho, uma uthwele kanzima, sondela sixoxisane ngoba kulesi simo esingajwayelekile, kubalulekile ukuthi sisebenzisane ukuze umasipala wethu uqhubekele phambili.
Ukuntshontshwa kukagesi namanzi kuyinkinga enkulu kakhulu kuMasipala wethu njengoba silahlekelwa yizizumbulu unyaka nonyaka. Kuwumsebenzi wethu sonke ukuthi silwe nalobu bugebengu ngoba abugcini nje ngokuthi umasipala alahlekelwe yimali, kwesinye isikhathi kudlula nemiphefumulo ngenxa yezinyokanyoka.
Sihlabeke umxhwele ngomsebenzi omkhulu siwubuholi balo mkhandlu esesiwenzile ukuthi lo masipala wethu ngaso sonke isikhathi, uyahlangabezana nezidingo zomphakathi. Yebo imiphumela angeke yabonakala manje kuzo zonke izindawo kodwa sesiwakhile amaxhama okuthi yonke into yenzeke ngokwesiko, ukuze kuthuthuke impilo yamakhasimende ethu.
Umsebenzi owenziwa ngamaqembu aphikisayo, umphakathi ngokunjalo nabezindaba ukuthi sihlale simazonzwane, siwuncoma kakhulu. Futhi sithi baqhubekele phambili ngalokhu ngoba ekugcineni ngokwenze njalo, kuhlomula wonke umuntu owakhele iTheku.
Kulesi sikhathi esinzima kangaka esibhekene nezwe, ake sibeke ipolitiki eceleni, sibuswe ukuvikela inhlalakahle yabantu bakithi ngaphandle kokubheka ukuthi balandela liphi iqembu lezepolitiki.
Kuwo wonke amasikhasimende ethu aqhubekayo nokukhokha, siswele imilomo eyizinkulungwane akuwabonga ngokuba yisibonelo esihle.
* UKaunda uyimeya kaMasipala weTheku