Isexwayiso sikaMkhize ngothaqa simqoka, asilalele
UNGQONGQOSHE wezeMpilo kuleli, uDkt Zweli Mkhize, usexwayise ngokuthi kungenzeka uma isimo siphoqa, izwe libuyiselwe esigabeni sesihlanu noma sesine sokuvalwa thaqa, kwezwe.
UMkhize ukusho lokhu kade ekhuluma nomunye wemisakazo yaseGauteng. Uthe kwakungashiwongo ukuthi ukuvalwa kwezwe kuyoba yinto eyokwenzeka kanye kuphela kodwa yinto izwe elingabuyela noma yinini kuyona uma kucaca ukuthi akulawuleki ukunqandwa kweCorona.
Ukhuluma kanjena nje uMkhize ngesikhathi sokuloba besebengaphezudlwana kuka-151 000 abantu abahaqwe yilesi sifo kanti asebeshonile bebengu-2 657. Isibalo sabantu abathelelekayo nabashonayo sinyuka mawala manje nokuyinto ebibhekiwe ukuthi izokwenzeka uma sekuqala ubusika.
UMkhize uthe yize bekuqonda ukuthi kumqoka nokuvuselela umnotho kodwa uma kungukuthi ezempilo zigcina sezithwele umthwalo omkhulu kuzomele ibhungwe eyokuthi aliphinde livalwe izwe ngoba lokho kunqanda ukuphithizela kwabantu abaningi ngoba izimboni eziningi zisuke zivaliwe.
Iyathusa futhi iyadabukisa inkulumo kaMkhize kodwa siyakuqonda ukuthi kungani bekumele akhiphe lesi sexwayiso ngoba kunabantu abacabanga ukuthi isigaba sesithathu sisho ukuthi izwe selivuliwe. Asazi noma badidwa ukuvulwa kwezimboni ezithile nokuthi izingane sezibuyele esikoleni yini njengoba sebenza noma yikanjani.
Ukuvulwa kwezimboni kwenzelwe ukuthi abantu bangabulawa yindlala nokuzama ukuvuselela umnotho ngoba ngeke bonke abantu bondliwa uhulumeni impilo yabo yonke.
Umonakalo owenzeke ngesikhathi izwe livaliwe thaqa usekude ukulungiseka, akekho umuntu ofisa izwe liphindele lapho ngoba bayofa abantu bebulawa yindlala.
Ukuhlonipha imithetho kathaqa awukwenzeli omunye umuntu, ukwenzela wena uqobo ngoba akekho osithandayo lesi simo sokungakwazi ukuyongcwaba nokungakwazi ukuhamba ngokukhululeka.
Asiyekeni ukuba wuvanzi, sigeze izandla ngensipho futhi sigqoke izifonyo uma siphoqeleka ukuthi siphume emakhaya.