Akuchitshiyelwe umthetho zingayitholi ibheyili izelelesi
MHLELI: Njengoba kuqala inyanga kaJulayi ethathwa njengenyanga yamadoda aqotho kuleli, umuntu uyazibuza uyaziphendula ukuthi iyophela sekubhubhe abantu besifazane abangaki njengoba kubhilite kangaka ukubulawa kwabo ngesihluku?
Kuphela enye kuqale enye inyanga uthembe ukuthi isimo sizoba ngcono kodwa kufane nje.
INkatha Freedom Party (IFP) ikholelwa ukuthi izibalo ezikhula imihla namalanga zokubulawa kwabesifazane nezingane ngesihluku ziyinkomba yokuthi umthetho wakuleli uyaxega.
Ngisho ngoba sekukhulunywe kakhulu kukhuzwa lo mkhuba kodwa kunokuba wehle udloba kakhulu kunakuqala kuhle komlilo wequbula.
Amanye amadoda enza lo mkhuba aseyiphuze inyongo inqubo yezobulungiswa yakuleli ngoba ayazi ukuthi intekenteke.
Kuphakathi kokuthi umsolwa uyabaleka agcwale amahlanga, noma amaphoyisa azikhandle ambambe ambophe kodwa abonakale esecanasa ngaphandle esekhishwe ngebheyili.
Ngesikhathi esakhishwe ngebheyili umsolwa, usabisa ofakazi noma abasoconge ababulale ngenhloso yokucima ubufakazi.
Kokunye kubulawa ngisho amalungu emindeni yabagilwa. Uma umsolwa esebuyela enkantolo kutholakala ukuthi ubufakazi abusekho noma kabenele kwazise umsolwa uthole ithuba loku’thulisa’ ofakazi esengaphandle ngebheyili.
Sekukaningi emacaleni afaka ukubulawa kwabesifazane uthola abasolwa bengazisoli ngezenzo zabo yize benenqwaba yezexwayiso zomthetho.
Yingangakho uthola abesifazane bebulawa phezu kokuba benezincwadi zomthetho ezibavikelayo, ezingaphezu ngisho kweyodwa.
Siyi-IFP, sinxusa uMnyango wezoBulungiswa ukuthi ubuyekeze uphinde uchibiyele imithetho ngoba akusizi ukuthi sibhikishele ukuthi abasolwa bathole izigwebo ezinzima ezinkantolo, ekubeni umthetho uqobo lwawo ungalungisiwe ezimpandeni zawo.
Sithi umsolwa akangayinikwa sanhlobo ibheyili njengoba kwenzeka, okanye ababandakanyeka kulawa macala banganikwa izigwebo ezincane ngoba abanye babulala abesifazane ngeqholo lokuthi bazodonsa baphume.
I-IFP iyakuncoma ukuthi abasolwa abagila leli chilo babhadle iminyaka ejele.
Egameni le-IFP namadoda aqotho sikhulekela ukuthi kule nyanga esiyiqalile kungafi noyedwa owesifazane ngesandla somuntu wesilisa.
Mnuz Blessed Gwala uSihlalo kaZwelonke weNkatha Freedom Party noMkhulumeli weQembu eKomitini lezokuPhepha nokuXhunyaniswa koMphakathi