UMbalula nabamatekisi ababuyele etafuleni baxoxe
MHLELI: Ngicela ukuthatha leli thuba ngisike elijikayo kwelakho lodumo eliwela umfula ugcwele ngenhloso yokuphosa itshe esivivaneni.
Ngikhathazekile ngemibhikisho edla lubi esiphenduke insakavukela umchilo wesidwaba embonini yamatekisi. Ishiya thina belungu bayo, esingabagibeli, sisengcupheni yokuphelelwa wumsebenzi kanti nesimo somnotho siyantengantenga kula malanga njengoba umsebenzi ungumendo wendoda.
Ngithokozile ngesiphakamiso sikaNgqongqoshe wezokuThutha, uMnuz Fikile Mbalula, esithi lesi yisikhathi sokuthi kwenziwe izinguquko ezinqala kule mboni ukuze konke kuhambe ngononina. Kodwa nakuba kunjalo uMbalula ubheca imboni ngobende inyama ingayidlanga uma ethi ibukela phasi uxhaso oluvela kuhulumeni.
Kucace bha njengonogwaja omhlophe ehlungwini ukuthi uMbalula uvika ngehawu lengulube kulolu daba.
Imboni izame kaningi ukufakana umlomo nohulumeni kepha yena wayilaxaza okwenyongo yenyathi ezinhlelweni zakhe. Ngakho-ke ukuphokophela kwemboni ukulwela okungokwayo kubanga ukuthi iteleke.
Siyazi ukuthi uma kududulana izinkunzi ezimbili kuqothuka utshani. Ngeshwa yithi bagibeli esimele utshani kule mpi yalezi zinhlaka zombili.
Kuzokhumbuleka ukuthi uhulumeni uke wazama ukufaka le mboni ngaphasi kwekhwapha lakhe ukuze athole intela ngayo. Nalapho ubuye elambatha. Yimpi yamagqubu le eliwayo.
Nakuba kunjalo ngiyafisa lezi zinhlaka zibuyele etafuleni zixoxe hleze kuvele isisombululo futhi kungabi bikho ozolekwa ngesoyi.
Phondolwendlovu Mzolo EMKHAMBATHINI, KWANYAVU