UMhlathuze Water ucela ukuba kongiwe amanzi
INHLANGANO ephakela amanzi komasipala abaseNyakatho yeKwaZulu-Natal iphakele nezimboni, Umhlathuze Water, icele abantu ukuthi bonge amanzi kulobu busika.
Isikhulu esiphezulu soMhlathuze Water uMnuz Mthokozisi Duze sithe amanzi ayancipha emadamini abo ngakho kubalulekile ukuthi abantu bawonge kwazise imvula ina kancane ebusika.
“Ucwaningo lwethu luveza ukuthi ayehla amanzi emadamini ethu okubalwa kuwo iGoedetrouw nePongolapoort. IGoedetrouw iphakela izimboni ezikoRichards Bay nomasipala abaseduze ngamanzi. Esontweni elidlule amanzi ehle esuka ku 55.2% aya ku-54.9. Amanzi ePongolapoort nayo ephakela omasipala abaseNyakatho yeKwaZulu-Natal ngamanzi ehle esuka ku-43.3 aya ku-43.1%,” kusho uDuze.
Uthe ukuncipha kwamanzi emadamini bebekulindele ngenxa yokuthi ebusika abayitholi imvula eyanele.
“Isikhathi sasebusika siza nezingqinamba zokungani kwemvula ngoba uma inile iba ncane kakhulu. Siye sithembele emanzini esiwagcina eizinqolobaneni zethu ukuthi asilonde size sithole imvula elandelayo. Kungalesi sizathu sicela ukuthi abantu bonge amanzi kulesi sikhathi sasebusika,” kusho uDuze.
Uthe Umhlathuze Water usebenza engxenyeni yeKwaZulu-Natal esazama ukubuyela esimeni emuva kokukhahlanyezwa yisomiso sango2015 okusho ukuthi ayinawo amanzi amaningi.
Uphethe ngokucela abantu ukuthi benze izidingo ezibalulekile ngamanzi bangawamoshi.