Bagculiswe yincazelo yowezeMfundo
UNGQONGQOSHE wezeMfundo KwaZulu-Natal uzophenya ngezinsolo zokuthi amaphoyisa aqinise isandla kubafundi ebebekhiyele umhloli befuna ukuhlolwa ngenkani ukuthi abanayo yini iCorona.
UMnuz Kwazi Mshengu obevakashele eNqabakazulu High KwaMashu izolo, uthe abafundi bakhala ngokuthi amaphoyisa aqinise isandla kubona abadubula ngezinhlamvu zenjoloba ebahlakaza ngoLwesibili, awazange abaxwayise avele adubula.
NgoLwesibili abafundi bavuke umbhejazana bavalela umhloli obefike esikoleni ezokhuluma nabo ngemigomo ezolandelwa njengoba kutholakale ukuthi omunye uthisha uneCorona ngoLwesihlanu. Abafundi abazange beneliseke ebebekutshelwa umhloli bathi akabanikanga ithuba lokuthi nabo babuze imibuzo ngalolu daba ngoba bona bebefuna ukuthi kuhlolwe othisha bonke nabafundi. Kuphethe ngokuthi bamkhiyele ngaphakathi esikoleni kwabizwa amaphoyisa afike abahlakaza ngokubadubula ngezinhlamvu zenjoloba.
“Abafundi sengibachazelile inqubo elandelwayo uma kube nomuntu okutholakale ukuthi unegciwane. Abafundi bakholwa ukuthi kumele othisha nabafundi bahlolwe bonke bese kudalulwa imiphumela ukuze babone ukuthi baphephile. Umgomo wezempilo awukuvumi lokho uthi kuhlolwa abasondelene nothintekayo. Abanye bahlala emakhaya izinsuku ezingu-14 kusabhekwa ukuthi azikho yini izimpawu ezivelayo kubo. Njengoba sesilahlekelwe yisikhathi manje sicele ukuthi obekumele bahlale emakhaya amasonto amabili kusabhekwa ukuthi azikho yini izimpawu ezibonakalayo kubo nabo bahlolwe ukuze kungachitheki esinye isikhathi ,” kusho yena.
U-Aphelele Ngcongo, umengameli wesigungu sabafundi esikoleni, uthe benelisekile incazelo kangqongqoshe kodwa bazobuyela emakilasini uma okumele bahlolwe sebekhonjiwe baphinde bahlolwa.