‘Ilahlekelwe iChiefs kuhamba uMaluleka’
UDOCTOR Khumalo uchaze ukuhamba kukaGeorge Maluleka kwiKaizer Chiefs njengokulahlekelwa okukhulu.
Ukuhamba kukaMaluleka kuvele sekuqinisekiwe futhi uvele usesukile kwiChiefs. UMaluleka ubheke kwiMamelodi Sundowns.
Usayine inkontileka yesibambiso namaBrazilians ezinyangeni ezintathu ezedlule. Kwase kuvele sekucacile ukuthi ngeke ayelule inkontileka yakhe naMakhosi.
Akavumanga ukusayina inkontileka yeminyaka emibili ayeyinikwa yiChiefs. Njengoba imidlalo yePremier Soccer League (PSL) imisiwe, umbuzo omkhulu wonke umuntu owubuzayo, wukuthi ngabe uMaluleka uzoyiqedela yini isizini kwiChiefs ngoba uyoze agqoke ijezi leSundowns ngesizini ezayo.
UKhumalo, owayedlalela iChiefs neBafana Bafana, akayifihli indlela azizwa ngayo ngokuhamba kukaMaluleka.
“Wukulahlekelwa okukhulu lokhu,” kusho uKhumalo ngesikhathi ebuzwa ngokuhamba kukaMaluleka kwiChiefs.
“Nginesiqiniseko iChiefs noMaluleka bebengafuni ukuthi kuphele ngendlela okuphele ngayo kodwa kuyacaca ukuthi kukhona izinto abangavumelananga ngazo.”
UMaluleka ngeke abe yingxenye yesikwadi seChiefs esibheke ukuqukula isicoco seligi uma imidlalo isibuyela ensimini kule nyanga. IChiefs isesicongweni lapho ihamba phambili ngamaphuzu amane. ISundowns iyibhincile endaweni yesibili.
“Yisimo esingemnandi lesi. Ekugcineni kumayelana nokuthi umuntu weneme yini. Kumayelana nokudlalela iqembu kahle futhi lokho kumele ukwenze ngokuziqhenya. Kodwa uma ungajabule ngeke ukwazi ukukwenza konke lokho. UGeorge wumfana okahle kakhulu, ngasebenza naye ngesikhathi siwina iligi kukhona uStuart Baxter. Ngikhulumile naye ngosuku lwami lokuzalwa. Ufonile engifisela usuku oluhle. Njengomuntu osekhulile kunaye ngimbuzile ukuthi unjani. Indlela engimuzwe ngayo ukuthi ubephansi ngoba ubenganeme,” kuchaza uKhumalo.
KwiChiefs uMaluleka uwine iligi kabili, Nedbank Cup neMTN 8. IChiefs iphinde yaqinisekisa ukuthi ngeke iyelule inkontileka kaKabelo Mahlasela njengamanje obolekiswe kwiPolokwane City.