Iyanyenyezwa eyokubuyisela uBrockie kuSuperSport
UMQEQESHI weSuperSport United, uKaitano Tembo, akafuni ukuyikhulumela eziko eyokubuyisa eqenjini umgadli uJeremy Brockie, ongenaqembu ngemuva kokuthi iMamelodi Sundowns ingazange iyilule inkontileka eyakhe.
Kuyimanje uBrockie ubuyele kwelakubo eNew Zealand ngemuva kokudedelwa yiMaritzburg United njengoba sesiphelile isivumelwano sokubolekana ebesikhona phakathi kwayo neSundowns.
UTembo obekhuluma nabezindaba izolo ngaphansi kophiko lweSouth African Football Journalists Association, uthe akafuni ukukhuluma ngabadlali abazofika nabazohamba ekubeni besenomsebenzi okumele bawuqele kwiPremier Soccer League (PSL).
Amaqembu aphezu kwamalungiselelo okubuyela ensimini ukuze kuqedelwe imidlalo esele kule sizini. Nokho asalindele iPSL ukuthi isho izinsuku okuzodlalwa ngazo.
“UJeremy ungumdlali ohlonishwayo eqenjini. Ungumgadli ohamba phambili eqenjini ngemuva kuka (Abram) Raselemane kodwa angiboni ukuthi kungaba nobulungiswa kubadlali ukuthi singakhuluma ngokuthi yibaphi abadlali abezayo nabazohamba okwamanje. Asikazi nokuthi sizoqala nini ukudlala. Uma isizini isiphelile singaqala sikhulume ngabahambayo nabazofika,” kusho uTembo.
Yize uTembo ekhulume kanjena, isikhulu se-United, uStan Matthews sike sazitshela izintatheli ngesifiso sabo sokubuyisa uBrockie. UMatthews waveza ukuthi bayakhuluma nemenenja kaBrockie ngenhloso yokumbuyisa kuleli qembu lasePitoli.
UBrockie wafika kuMatsatsantsa a Pitori ngo2015 washaya amagoli awu-53 ngaphambi kokuthi athengwe yiSundowns ngo-2018. Ufike wakuthola kunzima ukuthola ijezi kumaBrazilians wagcina ebolekiswe kwiMaritzburg maphakathi nale sizini njengoba manje engasenalo iqembu.
Uma lo mgadli engagcina ebuyile uzobe ezobanga indawo noThamsanqa Gabuza no-Evans Rusike. Kuzobe kukhona noBradley Grobler uma engahambanga njengoba kuthiwa kunamaqembu amgaqele.
Kunomgadli omusha u-Iqraam Rayners osuka kwiStellenbosch FC owasayina inkontileka yesibambiso ngoJanuwari. Lo mdlali ngeke abe yingxenye yeqembu elizoqedela imidlalo, uzobe engabhalisiwe njengomdlali waMatsatsantsa.