Kuzocaca maduze ngoVukusic
IKUSASA lomqeqeshi waMaZulu FC, uJozef Vukusic, lizocaca emasontweni amabili ezayo. Ngokusho kweqembu kuningi okusacutshungulwa yizikhulu zeqembu ngesimo somqeqeshi omiswe ngenxa yokugqoza kwemiphumela kwiNyokan’ Eluhlazana ezinyangeni ezedlule.
Empeleni AmaZulu andwanguza emathukwini elog. Asendaweni yesibili kwi-log uma usuka emsileni, ngenxa yakho ukuthi bezibuye zimphambe uVukusic owafika eqenjini ethembisa lukhulu. Ngokuthola kwethu ngeke esabuya uVukusic njengomqeqeshi woSuthu kodwa okubambile njengamanje wukuthi izingxoxo zesivumelwano senkece azohamba naso yizona ezimisile.
UBrilliant Mkhathini, okhulumela Usuthu, uthe sekuseduze phambili ngekusasa lomqeqeshi.
“Ngingakuqinisekisa ukuthi emasontweni amabili kusuka manje kuzobe sekucacile ngekusasa likaVukusic naMaZulu. Ngitshelwe ukuthi izikhulu zeqembu zisacubungulisisa kahle ukuthi yikuphi okumele kwenzeke. Njengamanje kuningi iqembu elixineke ngakho. Ngingabala indaba yokubuyela kweqembu ensimini njengoba uhulumeni esezidedelile ukuba zibulalane nokunye okuningi. Kodwa impela emasontweni amabili kuzobe sekukhishwa isimemezelo ngokusemthethweni,” kusho uMkhathini ocashe ngesithupha ebuzwa ukuthi ngabe usazobonakala yini uVukusic elibhekise emuva ikepisi egqoke imibala yoSuthu.
Kungenzeka ukube AmaZulu ashaya isidiyadiya ngoVukusic ngenxa yokuthi asanda kugilwa nguCavin Johnson asanda kumxosha, ewaphonsa enkantolo.
Empeleni uJohnson kuvela ukuthi ufuna itshe lemali kuMaZulu ngokumxosha ngendlela engeyinhle. Kodwa futhi kuyavela ukuthi abaphathi boSuthu bakholelwa ekutheni ngeke ayinuke leyo mali uJohnson ngoba wehlulwa umsebenzi.
Kukho konke lokhu abadlali abathathu uMichael Morton, Nhlanhla Vilakazi noMoeneeb Josephs izinkontileka azivuselelwanga okuhumusheka ngokuthi bayalishiya leli qembu.
Akucaci kahle nokho ngoJosephs ukuthi ikusasa lakhe limi kanjani neqembu kwazise kuphele inkontileka yakhe njengomdlali, hhayi njengephini lomqeqeshi waMaZulu.
Ngamanye amazwi ikusasa lakhe lincike ekutheni u-Ayanda “Cobra” Dlamini uzoqhubeka yini njengomqeqeshi waMaZulu.
“Asingaphangi umdaka okwamanje, asilinde iqembu lenze izimemezelo ezifanele, ngesikhathi esifanele,” usho kanje uMkhathini ebuzwa ngekusasa likaJosephs noDlamini njengabaqeqeshi beqembu elikhulu laMaZulu.
Njengoba kuqala inyanga uJulayi nje, iningi labadlali liphelelwa yizinkontileka emaqenjini ehlukene.
Kuthanda ukuba lukhunyana nokho kulokhu kwazise bekungadlalwa ngenxa yeCorona.
Ebuzwa uMkhathini ukuthi basazobadedela yini abanye abadlali ezinsukwini ezizayo uthe: “Kunzima ukusho okwamanje, kusekuningi okwenzekayo eqenjini izikhulu ezimatasa ngakho”.