UKhuzani ukhala ngokushiywa nguninakhulu
UMCULI kamaskandi uKhuzani Mpungose useveze ukuthi ukudlula emhlabeni kukagogo ozala unina kufana nse nokulahlekelwa ngunina.
UKhuzani izolo ekuseni ubhale ezinkundleni zokuxhumana ukuthi ushiywe nguninakhulu, uNkk Gcinephi Mngadi (70).
Uthe uninakhulu wamkhulisa waze waba yile nto ayiyona manje njengoba unina ashona eneminyaka engu-14.
“Uyazi ugogo ubesaphila ngisho emzimbeni, obesekhulile yilo ozala ubaba kunalona odlulile emhlabeni. Ngidumele ngempela umoya wami uphukile ngalesi sigameko. Ubeyikho konke kimi, ubesivalile isikhala sikamama kusukela wangishiya ngimncane. Kuhambe umuntu obengikhathalela aze angibuze ukuthi ngidlile yini,” kusho uKhuzani.
Uthe ubengalindele ukuthi uninakhulu uzodlula ngokuzuma okungaka njengoba embikele ekuqaleni kwaleli sonto ukuthi uzizwa enomkhuhlane.
“Ubengifonele ngoMgqibelo engibuza ukuthi usunjani umkhuhlane kimina. Uze wathi angibuye ekhaya ngingaguleli emazweni kodwa ngamtshela ukuthi kuzodlula. Uthe nje kimina yena uphile saka. Kodwa ngeSonto ungishayele ucingo wathi angithumele imoto ezomuyisa kudokotela ayombheka ukuthi unjani ngoba kukhona ukungazizwa kahle. Izolo ebusuku (ngoLwesithathu), ukufa kwafika kuyena singalindele,” kuchaza yena.
Uthe kubo kanina ubesesele noninakhulu kuphela.
Uthe uninakhulu ubekikiza uma ethole izindondo kodwa manje ngeke kusenzeka lokho.
Abalandeli balo mculi bakhalisene naye ngokudlula kukaninakhulu emhlabeni.
Neqembu le-IFP nalo lidlulisele amazwi enduduzo kuKhuzani ngalo mshophi.
Leli qembu lithe uninakhulu kaKhuzani ube ngomunye obeyisibonelo kubantu asebekhulile abakhulisa abazukulu babo ngabodwana.