Asizithande izingane zethu
MHLELI: Kwelakho ngithi angibhale ngincome uZimiphi “Zimdollar” Biyela (osesithombeni) kuKhozi FM. Cha le ntokazi iyangibusisa ngezihloko zayo. Uyazi ivele ifake isihloko esifika sithole indawo kumuntu.
Ohlelweni lakhe Zisengwa yinkehli ebusuku ufaka isihloko abese ecela ukuthi abalaleli bafone okanye bamthumelele imilayezo. Bayaba khona osikhwiliphambana nobhoko okuthi kukhulunywa ngokunye bona babe bekhuluma ngokunye ngoba befuna nje ukuzwakala emsakazweni kodwa lokho kungakuqedi amandla MaBiyela. Thina esithanda ukulalela siyakheka ngezihloko zakho. NgoJulayi 8 ngiphoxekile lapho ububuza khona ukuthi yini evimba ubaba wengane ukuthi angayondli ingane yakhe?
Ngabona kungena abalaleli abafona usuku nosuku futhi kuzona zonke izinhlelo bethi amaphutha angakubo akukho okubavimbayo. Ngisale nginombuzo othi laba bantu banemali yokufonela emsakazweni usuku nosuku kodwa kabanayo eyokondla amathumbu abo.
Kodwa ngithandile uma ngizwa sebethi isihloko sibavule amehlo sebezoshintsha ukwenza. Sengathi bangashintsha ngampela baqonde ukuthi ingane iyona ebalulekile ukwedlula ukufonela emsakazweni uhlelo nohlelo.
Nami ngihlaba ikhwela zinsizwa zakithi ake sibe wobaba abaqotho ezinganeni zethu. Lokho okuncane okutholayo ukuhambise ezinganeni, ningathengi ama-airtime okufona njalo emsakazweni izingane zibe zingadlile okanye zingenamali yokudla esikoleni, zithembela ekudleni kwesikole ukhona uphila uzwakala nasemsakazweni njalo.
Asingathwesi izingane amacala ezingawenzanga. Noma ngabe asizwani singabazali kodwa izingane zisithanda sobabili. Ngiyacela zinsizwa zakithi njengoba eseyihlokolozile uZimdollar thina-ke asibonise ukuthi singabantu siyalalela. Nabangahlawulile ababekelele imali bayohlawula emizini yamadoda.
Kumnandi kabi ukuhlawula ingane yakho. Kwenza nayo iziqhenye ngawe. Noma senahlukana nonina kodwa iyazi ukuthi ubaba wakhokha, ngibiza isibongo sakithi ngokufanele. Masingabi amagwala sibaleke kodwa sizwakala usuku nosuku emsakazweni.
Sengiphetha ngithi ngiyabonga kuwe MaBiyela uma uqhubeka kanje lizobuya izwe. Ngiyabona impela uyalilungisa kancane kancane. Uyabona uma uzwa indoda ithi ngiyawabona amaphutha ami sengizozama ukushintsha ukwenza kuyathokozisa lokho. Abanye abantu bashoda ngabantu abazobabonisa uthole ukuthi bahlangene ngomqondo owodwa wokubaleka. Akekho okhuza omunye kubo okanye emakubo yibo abasebenzayo nabashaya umthetho manje bayesatshwa abatshelwa noma sebebheda. Kukahle-ke uma bezotshelwa yini basakazi nabanye abalaleli abazwana neqiniso. Ngimthandile umlaleli othe akuhlawulwe emizini yabantu uma unganawo amandla gwema ukuzalisa ingane yabantu ngoba lokho kusho ukuzidalela utalatiya ongalugwema.
Izingane zethu asizinakekele sizikhombise uthando. Nani bantu besifazane ningalwi ngezingane uma sekwahlukenwe ngoba zona azingene ekuxabaneni kwethu.
Thanda Mnikaziwempuphu Chonco KWESAKWAMTHETHWA