Bazophenya ngezijumbane ezingasabalaliswanga
UMNYANGO wezokuThuthukiswa koMphakathi KwaZulu-Natal uthi uzoluphenya udaba lwezijumbane zokudla ezingafinyelelanga kubanikazi.
Izolo Isolezwe libike ukuthi ngenyanga eyedlule lo mnyango ukwaze ukuhambisa izijumbane zokudla ezingu-1025 esikhundleni zezingu-88 000.
Izijumbane zokudla zentengo elinganiselwa kuR25 million bekufanele zinikwe abahlwempu ngesikhathi somvalelandlini.
Umnyango usole izinhlangano ezingenzi nzuzo ngokuhluleka ukuhambisa izijumbane zokudla.
Okhulumela umnyango uMnuz Mhlabunzima Memela, uthe umnyango unesivumelwano nezinhlangano ezingenzi nzuzo ezintathu, wathi kepha kubukeka ikhona inkinga ekuhanjisweni kokudla.
“Eyodwa ibhekelele izindawo ezimaphakathi nesifundazwe, enye ibhekelele isifunda Ulundi bese enye ibhekelele uMgungundlovu neTheku.
Ngingakuqinisekisa ukuthi ukudla akuduvile emahhovisi omnyango.” Esitatimendeni uNgqongqoshe uNkk Nonhlanhla Khoza, uthe kuyakhathaza ukuthi izinhlangano ezingenzi nzuzo ziyahluleka wukugcina isivumelwano nakuba zinesipiliyoni seminyaka kulo msebenzi. Uthe sekunesikhathi eside zisebenzisana nomnyango. “Kubuhlungu futhi kuyihlazo njengoba abantu beqhubeka bedonsa kanzima. Sizokwenza isiqiniseko sokuthi okufanele baqondiswe ubugwegwe siyabaqondisa. Okusikhathaza kakhulu wukuthi lezi zinhlangano zanikezwa izinsiza zomnyango okubalwa izimoto, amaforklifts namakhadi kaphethroli kepha ziyahluleka ukuhambisa izijumbane zokudla,” kusho uNkk Khoza. Amalungu ekomiti eliqaphe ukusebenza komnyango esiShayamthetho saKwaZulu-Natal asigxekile isenzo sokuhluleka ukuhambisa izijumbane zokudla kubantu abafanelwe wukuzithola.