Ithuba liphika eyokukokotela izinombolo zePowerBall
BAPHIKA eyokukokotela izinombolo zeLotto abenkampani Ithuba emuva kokuthi ngoLwesibili kuphume izinombolo ezilandelanayo.
Obhekele ezokuxhumana enkampanini ephethe iLotto eNingizimu Afrika, Ithuba, uNkk Busisiwe Msizi, uthe uyazi akujwayelekile ukuthi kuphume izinombolo ezilandelanayo kodwa kuyenzeka.
“Bawu-20 abantu abawine uR114 million wePowerBall ngoLwesibili. Akukho okushaya amanzi esikwenzile. Izinombolo zikhethwe yikhompyutha njengenhlalayenza,” kusho uNkk Msizi.
Uthe izinombolo ziphume kwikhompyutha zithi 8, 5, 9, 7, 6 kwathi ibhonasi kwaba wu-10 kodwa uma sebezikhipha kwithelevishini baye bazibhale ngokulandelana kwazo okube wu-5, 6, 7, 8, 9 kwathi ibhonasi kwaba wu-10.
“Siyazi ukuthi kuye kwenzeke abantu bakhethe izinombolo ezifanayo, kwake kwenzeka nakudala. Ngesonto eledlule abantu ababili bawine uR19 million wePoweBall Plus. Besingalindele ukuthi abantu abawu-20 babambe iPowerBall yayizolo (ngoLwesibili) kodwa kube yizindaba ezimnandi kithina,” kusho uNkk Msizi.
Uthe Ithuba lizimisele ukutshintsha impilo yabantu ngemali ewinwayo.
Bayisishiyagalombili abawine iPowerBall eGoli, oyedwa useNorthern Cape, oyedwa useFree State, abathathu abaKwaZuluNatal, ababili abase-Eastern Cape, uyedwa eWestern Cape, uyedwa eMpumalanga abe yedwa naseLimpopo.
“Sicela abadlalile kulezi zindawo ukuthi babheke amathikithi abo ukuze balande imali yabo uma bewinile. Asingabazi ukuthi imali izoshintsha impilo yabo ngendlela enhle. Siyabahalalisela!” kusho uNkk Msizi. I-National Lotteries Commission (NLC) elawula iLotto iqinisekise umphakathi ukuthi imiphumela yeLotto ishaye khona. AbeNLC bakhiphe isitatimende emuva kokuthi imiphumela yePowerBall yangoLwesibili isuse umsindo ezinkundleni zokuxhumana abantu bekhala ngokuthi ayamukelekile.
Njengamanje Ithuba Holdings yilona elibhekelele iLotto. Nalo lithe akukho okubi okwenzekile.
Izolo iNLC ithe kulandelwa yonke imigomo ngaphambi kokukhipha imiphumela yeLotto.
“I-NLC ike yakhuluma neThuba ukuthi lisebenzise uhlelo lwezinombolo ezikhishwa yikhompyutha. Akekho umuntu ozihlelayo izinombolo kodwa zikhishwa yikhompyutha. Siyaluhlola lolu hlelo sonke isikhathi. Kuba khona nabacwaningi mabhuku abazimele nabasebenzi beNLC ukuqinisekisa ukuthi konke kuhamba kahle. Imiphumela eshicilelwe iyona akukho okubi okwenzekile,” kusho iNLC esitatimendeni.
Ithe iwutholile umbiko ngokutonyulwa kwezinombolo ngoLwesibili zePowerBall yacela Ithuba ukuthi lifundise umphakathi ngohlelo lokukhethwa kwezinombolo ukuze kwande ulwazi.
Ithuba kulindeleke ukuthi lifundise abantu ngokukhipha izitatimende emaphephandabeni, ezinkundleni zokuxhumana, kumathelevishini nasemisakazweni.
Abadinga imininingwane egcwele ngezinhlelo bangathinta lezi zinombolo:
National Lottery Player Helpline: 0800 484 822
National Lotteries Commission Helpline: 08600 65383 / lottoplayers@nlcsa.za