Abadwebi baqwashisa abantu ngeCovid-19
ABADWEBI abangamalungu enhlangano yamaciko Amasosha Movement baqwashisa abantu ngeCovid-19 embukisweni ozodonsa amasonto amane owethulwe ngoMsombuluko Ekomkhulu Art Space eWindermere, eThekwini.
IThings Fall Apart, okuhloswe ngayo ukuvula imiqondo yabantu ngezithombe zemidwebo mayelana nokumele bakugweme ngenxa yokuhlaselwa kwezwe yiCovi-19, izoze igoqwe ngoDisemba 31, ngokusho kukaMnuz Mthobisi Maphumulo, omunye wamaciko akhombisa ngemisebenzi yawo.
Uthe uyakholwa wukuthi abantu baseThekwini nabahambela idolobha abazifela ngobuciko, bazowubamba umyalezo odluliswa ngombukiso.
“Thina bantu abamnyama asikwazi ukusizakala kalula eminyangweni eneqhaza ekulekeleleni ababhali bezincwadi yingakho njengamasosha siqoke ukuthi senze umbukiso. Lesi simo esibhekene naso sizoba wumlando kubazukulu nasezizukulwaneni zethu yingakho sithe nathi asenze okungaba wumlando ohambisana nomsebenzi owenziwa ngamaciko,” kusho uMaphumulo.
Uthe ngoLwesihlanu kuzoba nomcimbi ozoqala ngo-12 emini, okuzobe kubukwa kuwo imisebenzi enamekwe ezindongeni ze-gallery abayisebenzisayo.
Uthe kuzobe kuvumeleke wonke umuntu kuwo.
“Abantu abanemibuzo ngomsebenzi wethu bazothola ithuba lokuphenduleka kuyo imibuzo abanayo ngoba nathi sizobe sikhona. Kungenwa mahhala nezingane zamukelekile ukuthi zifike nabazali.”
Bayisishiyagalombili abadwebi abanameke imisebenzi yabo embukisweni – Morgan Mahape, Andile Maphumulo, Thembi Mthembu, Nhlakanipho Ndimande, Nkosinathi Mdluli, Wright Makhathini, Nongani Luthuli noMthobisi Maphumulo.