Bayasamukela isinqumo ngemicimbi
ABAHLELI bemicimbi bathi bayasamukela isinqumo sikahulumeni waKwaZulu-Natal sokuthi ihoxiswe imicimbi emikhulu ngamaholidi kaDisemba ngenhloso yokuzama ukunqanda ukubhebhetheka kweCovid-19.
Okhulumela uhulumeni uLennox Mabaso uthe imicimbi eheha izinkulungwane zabantu kumele ingabi khona.
“Uhulumeni ukhulume nongoti bezempilo abeluleke ngokuthi ayimiswe ngenxa yokunyuka kwesibalo sabahaqwa yiCovid-19. Akukhona ukuthi akafuni ukuthi ibe khona nokuthi umnotho uphinde usimame kodwa isimo asivumi,” kusho uMabaso. Uthe kukubahleli ukuthi bayaqhubeka yini nemicimbi uma bezolandela imigomo ebekiwe. Ngokukahulumeni imicimbi eyenziwa ezindaweni ezivulelekile kumele ibe nabantu abangeqile ku-500.
“Imicimbi emincane neyemindeni enesibalo esincane sabantu ingaqhubeka kodwa kulandelwe imithetho. Lesi yisinqumo esimile kuze kwenziwe esinye isimemezelo futhi,” kuchaza uMabaso.
Umhleli weFact Durban Rocks uDJ Tira, uthe bayasamukela isinqumo sikahulumeni kodwa umcimbi wabo uzoqhubeka ngaphandle kwezethameli.
“Sihlanganisa ikhonsathi ezokwenza ukuthi abantu babe nento ezobenza bahlale emakhaya. Sinxusa uhulumeni asixhase ngoba ukuhoxiswa kwemicimbi akushayi amaciko kuphela kodwa namabhizinisi amancane avele ashayekile asebenza ngemicimbi,” kusho uTira. IFact Durban Rocks izoba ngoDisemba 31 izoqala ngo-9 ebusuku.
UTira uthe kuzonandisa yena, Sjava, Simmy, Nomcebo Zikode, Blaq Diamond, Shimza, Dlala Thukzin nabanye.
Umhleli weDurban Jazz Festival eba ngoDisemba 26 uMdu Ngcobo, uthe bayasamukela isinqumo yize bebengathanda ukuthi uhulumeni ababize abachazele esithe ngaphambi kokumemezela emphakathini.
“Ayikho i-jazz kulo nyaka ngoba sihlonipha imithetho. Abantu abaphephe undunankulu usekhulumile.”