Akunqandwe ukuputshuka kwaka-matric
IAsingabazi ukuthi iCovid-19 yengeze umthwalo kubafundi baka-2020, ikakhulukazi abasezikoleni zasemakhaya nasemalokishini.
Kodwa-ke kasikho isizathu esigunyaza ukuputshuka kwamaphepha ngoba kungaholela ekutheni kuqalwe phansi ukubhala okungeke kube ubulungiswa kubafundi abebezikhandlile belungiselela ukubhala ngaphandle kokukopela.
Kuqale ngezinsolo ngokuputshuka kweMaths Paper 2 eGauteng naseLimpopo.
Kutholakale ukuthi yisitshudeni sasenyuvesi esibikele uMnyango wezeMfundo ngabafundi ababefuna usizo “ngembuzi” ngaphambi kokubhala.
Ngemuva kwalokho kuhlaluke ukuthi nezinye izifundazwe eziyisithupha ziyathinteka “ekuhlinzweni kwembuzi” ngaphandle kweFree State.
Kubuye kwatholakala nokuthi sekuputshuke nePhysical Science Paper 2.
Umnikazi wenhlangano engenzi-nzuzo waseGauteng nguye owabhobosa ithumba ezinkundleni zokuxhumana ngemva kokubona “imbuzi ihlinzwa” kwiWhatsApp.
Kube nezinsolo zokuhlinzwa kweMaths Paper 1 KwaZulu-Natal.
Manje sekuvela ukuthi nephepha leBusiness Economics likhishelwe abafundi ngaphambi kokuba libhalwe okuvele ngesikhathi kuphenywa ngokupusthuka kweleLife Science.
Phezu kwalezi zehlo, izikhulu zomnyango zisamile ekutheni izivivinyo zengamelwe ngobuqotho.
Kuzo zonke izigameko uNgqongqoshe wezeMfundo, uNkk Angie Motshekga, nabasebenzi bomnyango bathelwe ngehlazo. Futhi kunezinsolo zokuthi kukhona namanye amaphepha aputshukile.
Nokho-ke uyancomeka umsebenzi woKlebe ngokubamba umuntu osolwa ngokunika abafundi iphepha leMaths. Kuboshwe uMnuz Themba Daniel Shikwambana ongumsebenzi wenkampani egayela uMnyango wezeMfundo amaphepha ezivivinyo.
Siyathemba ukuthi kuzotholakala ubufakazi ukuze bonke ababandakanyeka ekuputshukeni kwamaphepha baboshwe bese beyashushiswa.
Akumele ikusasa lezingane libekwe engcupheni abantu abagcwele inkohlakalo. Nankanjani kufanele kunqandwe ukuputshuzwa kwamaphepha.