I-IFP idla lubi ngabazingela ngokungemthetho
I-IFP ifuna bajeziswe abazingela izilwane zasendle ngenhloso yokudayisa izikhumba zazo.
UMnuz Blessed Gwala, okhulumela i-IFP kwezokuPhepha koMphakathi esiShayamthetho saKwaZuluNatal, izolo uthe ababhekele ukongiwa kwemvelo eNkandla, Qhudeni, Ngotshe, Amatikulu nakwezinye izindawo bahlezi lubhojozi.
UGwala ubachaze ngokuthi bayizigebengu abantu abazingela izilwane zasendle, ngenhloso yokudayisa izikhumba zazo.
Uthe lezi zigebengu zinohlobo oluthile lwezinja ezilusebenzisayo uma ziyozingela.
“Kasihambisani nokuzingela okungekho semthethweni ngoba kuzoholela ekutheni izilwane zishabalale. Lezi zigebengu ezizingela izilwane zasendle, zibuye zisabise abasebenzi bezeMvelo KZN Widlife uma ziyozingela ngokungemthetho,” kusho uGwala.
Ucele izinhlaka zomthetho ukuthi zingenele ukuze kujeziswe amasela azingela ngokungekho emthethweni, adicilela phansi imvelo.
“Imiphakathi yasemakhaya iyakuhlonipha ukuzingela, iyazi ukuthi kunesikhathi sakho, hhayi le nto eyenziwa yilezi zigebengu. Sicela amakhosi nezinduna basebenzisane namaphoyisa, ukuze kuqedwe lo mkhuba omubi owenziwa ngamasela azibiza ngabazingeli,” kusho uGwala.
UMnuz Musa Mntambo, obhekele ezokuxhumana kwezeMvelo KZN Wildlife, uthe basibonile isitatimende se-IFP futhi kuyiqiniso ukuthi zandile izigameko zokuzingela ngokungemthetho ezindaweni ezilondoloza imvelo.
“Zandile izigameko zokuzingela ngokungemthetho eziqiwini zikahulumeni nezizimele. Ezinye iziqiwi ezizimele zithole ukuthi abantu bayangena bazingele ngaphakathi kuzo. Sibone ukuthi lezi zigameko zande kakhulu ngesikhathi sikathaqa, ngesikhathi abantu kade bezingelela ukulala bedlile. AbezeMvelo baxwayisa abazingela ngokungekho emthethweni ukuthi bawuyeke lo mkhuba ngoba uyicala elibomvu,” kusho uMntambo.
Uthe umthetho, iNature Conservation ka-1974, uthi noma wubani ozingela ngokumthetho, noma ofohla lapho kongiwa khona imvelo nezikhali, kufanele aboshwe.
Uma eseboshiwe angavalelwa unyaka owodwa noma akhokhiswe uR5 000 noma aboshwe, afunwe nenhlawulo.
“Abasebenzi bethu bazoqhubeka nomsebenzi wokuvikela nokonga imvelo ngaphandle kokwenzelela nokusaba. Ukusatshiswa kwabasebenzi abagcina umthetho kuhlale kukhona. Kodwa lokhu kakusho ukuthi abasebenzi bezemvelo bazoyeka ukwenza umsebenzi wabo,” kusho uMntambo.
Ucele umphakathi ukuthi ubike abazingela ngokukho emthethweni emaphoyiseni aseduze nabo naseziqiwini zabezeMvelo KZN Wildlife abaseduze.