OweSwallows ubhoboka ngokufunwa ngabeChiefs
INJINI yeMoroka Swallows, uGiven Thibedi, ibhoboka ngokulandelwa ngabalandeli beKaizer Chiefs abafuna ibuyele eNaturena iyotakula iqembu labo.
UThibedi, ubolekiswe yiChiefs kwiSwallows ekuqaleni kwesizini edlule, Izinyoni zisadlala kwiGladAfrica Championship. Ubekade ehambisana no-Itumeleng Shopane, Ayanda Rorwana, bajoyinwa nguSizwe Twala ngokuhamba kwesikhathi. Ekuqaleni kwesizini ka-2020/2021, iChiefs inqume ukungababuyisi laba badlali. Kodwa emasontweni adlule ishintshe umqondo, yababuyisa abanye, yamshiya uThibedi.
“Konke lapho engihamba khona abalandeli beChiefs bathi mangibuye ngizolungisa isimo. Kodwa ngivele ngizihlekele ngoba kangazi ukuthi kufanele ngithini. Ngeke ngisho ukuthi ngifuna ukubuyela kwiChiefs. Uma kwenzeka ngizokwamukela. Konke kuyintando yoMdali. Mina kangikhethile, inqobo nje uma ngizodlala ukuze ngizokhula ngokushesha ebholeni. Noma ngabe kwenzekani, ngifuna ukuba senkundleni. Ngesikhathi abanye bebuyela kwiChiefs, kangibanga nankinga ngoba bengazi ukuthi mina kangibuyeli. Akukho engangitshelwe khona. Kodwa ngiyazi ukuthi noma yinini uma bengidinga bazongibiza ngoba ngingumdlali wabo,” kusho uThibedi.
UThibedi ubedlala ngokuzwana noNkosingiphile Ngcobo noHappy Mashiane eqenjini laMakhosi leDStv Multichoice, ngaphansi komqeqeshi u-Arthur Zwane. UNgcobo usephenduke intandokazi yabalandeli ngaphansi komqeqeshi uGavin Hunt, esikimi esikhulu.
Amakhosi bekubhekwe ukuthi azophinda abahlanganise laba badlali kwazise adonsa isigwebo seFifa esingawavumeli ukuthi abhalise abasha.
UThibedi uyazitamuzela isikimu kwiSwallows, ngaphansi komqeqeshi uBrandon Truter, phezu kokuba ebanga indawo nezinsepe okukhona kuzona uMusa Nyatama, odlalele iMamelodi Sundowns ne-Orlando Pirates. Izinyoni zizogadulisana neLamontville Golden Arrows koweDStv Premiership eDobsonville Stadium, eSoweto, kusasa ngo-3.30 ntambama. ISwallows ibalwa namaqembu ayiqale ngegiya eliphezulu isizini ka-2020/2021.