Uncoma ukungancethezi kukaMiddendorp kubadlali
IPHINI lo mqeqeshi kwiMaritzburg United uDelron Buckley, lincoma umqeqeshi waleli qembu u-Ernst “Mazinyo” Middendorp ngokungancethezi kubadlali. UBuckley utshele izintatheli izolo ukuthi ukufika kukaMiddendorp kuzolisiza kakhulu iqembu ngoba utshela abadlali kwezikabhoqo uma kukhona angakuboni kahle.
ITeam Of Choice izobhekana neqembu elizihola phambili kwi-log yeDStv Premiership, iMamelodi Sundowns, kusasa ngo-8.15 ebusuku, eHarry Gwala Stadium. Ziya kulo mdlalo ziyabheda izinto kwiMaritzburg esanda kuxosha umqeqeshi u-Eric Tinkler obephikwa yimiphumela. Ngemuva kwemidlalo emihlanu kwiDStv Premiership, iMaritzburg ayinalo nelilodwa iphuzu, igingqa inguzunga yeqanda emsileni we-log.
Lokhu kuphoqe izikhulu zeqembu ukuthi zikhombe indlela uTinkler, zaqasha umakadebona womqeqeshi ebholeni lakuleli uMiddendorp.
“Engikuthanda ngoMiddendorp ukuthi akancethezi, akalokhu ezenza into angeyona umuntu umtshela kwezikabhoqo into angayithandi. KuMiddendrop usheshe ubone ukuthi impilo yakho izoba mfishane eqenjini uma ungakwenzi akufunayo. Selokhu efikile kuyacaca lapha kwiMaritzburg, kunabadlali asebatshelile ukuthi ufuna bekhuphule amasokisi kungenjalo ngeke abadlalise. Kadeni lesi simo iqembu elizithola likusona, lidinga umuntu onjengoMiddendorp ukuze izinto zizolunga,” kusho uBuckley.
Leli phephandaba libuze uBuckley ukuthi kungani izinto kade zingahambi kahle kusekhona uTinkler, abesebenzisana naye.
“Besidlala yonke inhlobo yebhola ngaphansi kukaTinkler. Besiqala kahle emuva, siwuhlelela kahle futhi umdlalo. Kodwa inkinga nje ebesibhekene nayo kakhulu ukuthi besingawashayi amagoli nhlobo. Besiphenduka omampumpane ngemuva komdlalo sizibuze ukuthi yikuphi ngempela esingakwenzanga, kucace ukuthi amagoli yiwona esingawashayi,” kulandisa uBuckley.
Ngokusho kukaBuckley, phakathi kwezinto ezigqamile esezenziwe uMiddendorp ejimini, ukudlalisa abadlali ngaphansi kwengcindezi.
“Lonke isonto uMiddendorp ubeyivalile inkundla ejwayeza abadlali ukudlala ngaphansi kwengcindezi. Ubebatshela ukuba baqinise unyawo uma bemakana, bengancengani. Naphambi kwamapali, ubebacija ngezinto okumele bazenze ukuze kuzobhakuza inethi. Ngibona ukuthi umdlalo wethu neSundowns yiwona esizoshintsha ngawo izinto, kufanele kube khona esikutholayo ukubuyisa ukuzethemba kubadlali bethu,” kusho uBuckley.
IMIDLALO YEDSTV PREMIERSHIP: KUSASA - Ngo-3.30pn: Cape Town City v Orlando Pirates (Cape Town Stadium); Golden Arrows v Swallows (Sugar Ray Xulu Stadium). Ngo-6pm: Tshakhuma FC v AmaZulu FC (Thohoyandou Stadium). Ngo-8.15pm: Maritzburg United v Mamelodi Sundowns (Harry Gwala Stadium). NgeSonto - Ngo-3.30pm: TS Galaxy v Stellenbosch (Mbombela Stadium); Baroka v Chippa United (Peter Mokaba Stadium).