UVusi Kunene uzolingisa emdlalweni we-e.tv
ABALANDELI benkakha yomlingisi uVusi Kunene ebigcina ukubonakala kwiGenerations: The Legacy ngoLwesithathu, bazokhala babuye nganeno njengoba iqopha nomdlalo omusha wakwi-e.tv.
UVusi, obedlala indawo kaJack Mabaso kwiGenerations: The Legacy ekhonjiswa ngo-8 ebusuku phakathi nesonto kwSABC1, ubegcina ukubonakala kulo mdlalo emuva "kokubulawa".
UJack kuthe ehleli endlini nomfowabo uSiyanda (Kay Sibiya) nendodakazi uSphe
(Pearl Monama), kwangena amadoda aseRussia abakhomba ngezibhamu, ababopha abavala amehlo nomlomo.
Aphumele noJack ngaphandle okuyilapho afike ambulalela khona ngokumqoba ngesaha maqede isidumbu sakhe asifaka emphongolweni.
Isidumbu sigcine singabonakalanga futhi namaphoyisa athe awasitholanga.
Ngokuthola kwaleli phephandaba uVusi uzolingisa indawo ephambili emdlalweni omusha ozovala isikhala seRhythm City, iHouse of Zwide okuthiwa usuqalile ukuqoshwa.
Ethintwa izolo ekuseni akavumanga futhi akaphingaka ukuthi uya kulo mdlalo.
"Ngicela ukuthola imvume kuqala angazi kungakanani okumele ngikusho nokungamele ngikusho," kusho uVusi ecela ukushayelwa emuva kwemizuzu engu-20.
Uthe esethintwa ucingo wangabe esalubamba futhi nomyalezo athunyelelwe wona ugcine engawuphendulanga.
Esitatimendeni esikhishwe yiyGenerations: The Legacy, kuthiwe uVusi uhlaba ikhefu kulo mdlalo emuva kweminyaka emihlanu.
Kusona uthe uyazifela ngoJack futhi nguyena mlingiswa odume kunabo bonke kwaseke wabadlala.
"Ngizokhumbula wonke umuntu ngoba iGenerations ifana nomndeni."
KwiHouse of Zwide kuthiwa uzobe edlala phambili noJeffrey Sekele obedlala indawo kaBlade kwiSibaya kuMzansi Magic.
Imizamo yokuthola uJeffrey izolo ayiphumelelanga njengoba ucingo lwakhe belungabanjwa futhi nomyalezo ugcine engawuphendulanga.
I-House of Zwide ikhiqizwa yiBomb Production. Umdidiyeli weBomb u-Angus Gibson ucingo lwakhe ubengalubambi.
I-Rhythm City izogcina ukubonakala ngoJulayi 16.
Phambilini inhloko yemidlalo evutshelwe eNingizimu Afrika yakwa-e.tv uHelga Palmer, yathi okwamanje ngo-7 ebusuku basagxile kwiRhythm City kuze kufike isikhathi sokuphela kwayo.
"Siyabajabulela ababukeli ukuthi bazi ukuthi yini elandelayo kodwa isimemezelo esisemthethweni ngokuthi yini ezongena esikhaleni seRhythm City, sizosenza ngokuhamba kwesikhathi."