UZikalala uchaza ngomhlangano neSilo
UNDUNANKULU waKwaZuluNatal, uMnuz Sihle Zikalala, ucacise ngomhlangano abe nawo izolo neSilo Samabandla onke, uMisuzulu kaZwelithini, okulindeleke ukuba maduze sigcotshwe ngokusemthethweni.
UZikalala uhlangane neSilo esigodlweni KwaKhangelamankengane izolo. Bekungokokuqala behlangana kusukela iSilo singene esihlalweni sobukhosi.
Ngokwendlunkulu, iSilo sivele sesihlezi esihlalweni, sekushoda ngasohlangothini lukahulumeni ukuba sethulwe ngokusemthethweni.
UZikalala uthe inhloso yomhlangano bekungukuyoqinisa ubudlelwane phakathi kwehhovisi lakhe nendlunkulu.
“SiyiHhovisi likaNdunankulu, sisingatha izindaba zendlunkulu iyonke, ngoba indlunkulu ingaphansi kwalo.
“Bekubalulekile ukuthi sichaze ukuthi indlela esisebenzisana ngayo nendlunkulu injani futhi imi kanjani. Sikwazile ukuvumelana ukuthi sizosebenzisana kanjani ukuya phambili.”
Ebuzwa ngemigudu okufanele ilandelwe ngokugcotshwa kweSilo, uthe indlunkulu kufanele ilethe amaminithi omhlangano okuqokwe kuwo iSilo kuqala.
“Ngeke siyixine indlunkulu ukuthi isinikeze amaminithi ngokushesha. Sizobalinda baze baqede izinto zabo zangaphakathi. Uma sebeqedile, sizocubungula konke.
“Uma sanelisekile ngakho konke siyobe sesithatha udaba siluyise kuNgqongqoshe wezokuBusa ngokuBambisana neziNdaba zoMdabu, uDkt Nkosazana Dlamini Zuma noMengameli Cyril Ramaphosa. Emva kwalokho iSilo siyobe sesigcotshwa ngokusemthethweni.”
UZikalala uthe uhulumeni waKwaZulu-Natal uzoqhubeka nokweseka indlunkulu.
Namhlanje, uZikalala uzokwethula isabelomali sehhovisi lakhe, nalapho ezoveza khona ukuthi yabiwe kanjani imali yesikhwama sasendlunkulu iRoyal Household Trust. Ngonyaka wemali owedlule, iRoyal Household Trust yabelwa imali engaphezu kukaR70 million.
UZikalala ubuye wachaza ngokudideka okwasuka ngesikhathi kuvela amahlebezi athi sekuphume umyalelo othi kuhoxiswe amaphoyisa aqapha iSilo nezigodlo.
Uthe kwaba khona ukushayisana kokuxhumana emazingeni aphansi emaphoyiseni. Echaza uZikalala, uthe kukhona uphiko lwamaphoyisa olwengeziwe olwalukade lutshalwe okwesikhashana ukuba luqaphe iSilo. Uthe emazingeni aphansi emaphoyiseni kwaba nokukhuluma indaba yokuthi lolu phiko lushintshwe.
“Leyo nto yayingakhulunywanga
THUMELA umbono ngalolu daba kuFacebook (Isolezwe), kuTwitter (@isolezwenews) noma
umqhafazo ku-45773. I-sms ibiza R1,50. nabaphathi. Bathi abaphathi bamaphoyisa uma beyithola, babe sebekuphikisa lokho. Ngikhuluma nje lawo maphoyisa akhona, njengoba nani nizibonela. Amaphoyisa akhona lapha, kawazange ahoxiswe. Akhona kuzona zonke izigodlo.”
Khonamanjalo, uNdunankulu kaZulu, uMntwana uMangosuthu Buthelezi, uphinde wachaza ngengqikithi yomhlangano wamalungu asendlunkulu namhlanje.
UButhelezi uthe inhloso yomhlangano wukukhumelana umlotha namalungu asendlunkulu, uMntwana uThembi noMntwana uMbonisi, ayenombono owehlukile ngaphambi kokuthi kuqokwe iSilo.