Uphinde waqala phansi umkhankaso we-ivermectin
iqale umkhankaso wokunxusa uhulumeni ukuthi avumele ukusetshenziswa kwaleli khambi.
Inkantolo yasePitoli yakhipha isinqumo sokuthi udokotela angakwazi ukulisebenzisa ikhambi uma ebona kunesidingo.
I-Sahpra yaxegisa umgomo wokusetshenziswa kwalo khambi, yathi udokotela kusamele achaze ukuthi kungani efuna ukulisebenzisa. Yathi uma isiguli siba nenkinga, udokotela nguyena okumele abhekane naleyo ndaba.
UMnuz Bernard Uys, okhulumela i-Afri-Forum, uthe odokotela bayangabaza ukusebenzisa leli khambi ngenxa yokuthi besaba ukuthi uma kwenzeka iziguli ziba nenkinga, yibo okumele babhekane nayo.
"Sifuna ukuthi iSahpra igunyaze ukuthi leli khambi lisetshenziswe njengamanye amakhambi okwelashwa ngawo leli gciwane, kungabi khona imibandela ngoba lokho kwenza ukuthi odokotela besabe ukulisebenzisa,” kusho u-Uys.
Uthe liyikhambi elisetshenziswa e-India futhi lenze umehluko lasiza ekutheni lehle izinga labantu ababulalwa yiCovid-19.
USolwazi Jerry Mphahlele, weSouth African Medical Research Council (SAMRC), uthe okwamanje kabukho ubufakazi bocwaningo oluveza ukuthi leli khambi liyasebenza, ngakho kakulula ukuligunyaza.
UDkt Peter Oberem we-AfriVet, uthe kunokudideka ngaleli khambi. Abaningi bazitshela ukuthi abantu belashwa ngekhambi lezilwane ekubeni kakunjalo, likhona elenzelwe ukwelapha abantu uma benezifo ezidalwa yizilwane, okungaba yizikelemu noma umbandamu. Kodwa udokotela wubefaka isicelo kwiSahpra.
"Lo muthi uyasebenza ekwelapheni abantu abancinzwe yizinambuzane, baba ne-elephantisis. Kuyavela ukuthi liyazelapha izifo ezidalwa ngamagciwane kodwa akukho okubhalwe phansi ngalokho. I-Covid-19 iyisifo esidalwa ngamagciwane futhi bukhona ukufakazi bokuthi leli khambi liyasiza ekuyelapheni. Ngokubona kwami, ngenxa yesimo esiphoqayo esibhekene naso, kumele igunyazwe," kusho u-Oberem.
I-Sahpra kayikasho lutho ngalesi siphakamiso sakamuva.