Umbhikisho bevalelwa ugesi ‘abawukokotele’
KUSUKE esinamathambo izakhamuzi zaseMbali, e-3 naseCC, zivalelwa ugesi okuthiwa ziwukokotele. Izakhamuzi ezilokhu zivalelwe ugesi ngoLwesithathu ekuseni, zivuke umbhejazana izolo, zavala imigwaqo, zifuna kubuyiswe ugesi.
Umbhikisho uphazamise ukuhamba kwezimoto njengoba izakhamuzi bezivale ezindaweni eziningi ezehlukene okubalwa kuzo nomgwaqo oxhumanisa amalokishi amaningi nedolobha, uMoses Mabhida.
Umbhikisho uphinde waphazamisa nokubhalisela ukugomela ubhubhane iCorona, obekuhlelwe ukuthi kube sehholo lomphakathi kwa-J.
Echaza omunye wababhikishi ocele igama lakhe lingadalulwa, uthe abazange bathole ncazelo ngokuvalwa kukagesi.
“Sekuphele usuku lonke manje ugesi uhambile, sisebumnyameni ngokuthi ugesi uvalelweni. Silale singadlile, nanamhlanje (izolo) kuyacaca ukuthi sizolala singadlile.”
Ababhikishi bathe bazoqhubeka nokuvala imigwaqo baze bathole incazelo eqondile ngokuvalwa kukagesi.
Ikhansela lendawo, uMnuz Xolani Ngongoma, likhale ngokuxhumana okungekuhle phakathi kwenkampani ehlinzeka ngogesi, i-Eskom, nezakhamuzi.
UNgongoma uthe i-Eskom bekufanele engabe izazisile izakhamuzi ngohlelo lokuhlola izigubhu zikagesi ukuthi azikokoteliwe yini.
Uthe akuzwile ukuthi i-Eskom ibifuna ukushintshela izakhamuzi izigubhu zikagesi wekhadi ezikokoteliwe mahhala, bese kuthi labo abakokotele ugesi we-meter bahlawuliswe uR7 000.
Okhulumela i-Eskom KwaZulu-Natal, uNksz Joyce Zingoni, uthe inkinga iqale ngalo uLwesibili, ngesikhathi izakhamuzi zinqabela abasebenzi bale nkampani ababehlola ukuthi abantu abawukokotelile yini ugesi.
“Abasebenzi batshelwa ukuthi abaphume baphele kuleli lokishi. Basabisa ngokuthi bazoshisa izimoto ze-Eskom uma abasebenzi beqhubeka nomsebenzi wabo. Abasebenzi babe sebephoqeleka ukuthi bashiye phansi umsebenzi.”
UNksz Zingoni uthe izakhamuzi zisazoqhubeka nokuhlala ngobumnyama uma zingavumeli abasebenzi be-Eskom ukuthi baqhubeke babheke abantu abakokotele ugesi.
“Njengamanje ugesi usacinyiwe futhi sizowukhanyisa uma sesazi ukuthi kuphephile yini ukuthi abasebenzi bengabuyela emsebenzini, futhi sebehlole yonke imizi ukuthi ayiwukokotelile yini ugesi.”