Kuxwayiswa ngesivuvu sesithathu seCovid-19
"Sisebenzisa ubuchwepheshe obuhlola ukuthi ngabe leli gciwane lizishintsha kanjani, ukuze sisheshe sibone uma selizishintshile. Imiphakathi yethu siyakhuluma nayo siyeluleke ngezinto okumele izigweme ukuze sinqande ukusabalala ngesivinini kwaleli gciwane."
"Izibalo zezinsuku ezingu-14 zikhomba ukuthi izibalo zabahaqwe yileli gciwane zenyuke zisuka ku-17 017 zafinyelela ku-21 124, okusho ukuthi ngamasonto amabili izibalo zenyuke ngo24%," kusho yena.
Uthe kuzo zonke izifundazwe izibalo zenyukile kodwa izifundazwe ezihamba phambili yiNorthen Cape, khona zenyuke ngo-68% ezinsukwini eziyisikhombisa, eGauteng zenyuke ngo-63%, eLimpopo ngo-47%, eNorth West zenyuke ngo-42% kuthi eWestern Cape zenyuke ngo39%.
Uthe izibalo zabantu ababulewe yizifo ezeyamaniswa neCovid-19 zenyuke ngo-18.22% ngeledlule.
"Bangu-56 059 abasebenzi bezempilo imiphumela yokuhlolwa kwabo ekhomba ukuthi bahaqwe yileli gciwane, u-14% wabo kudingeke ukuthi ulaliswe ezibhedlela, bangu-83 abasalaliswe ezibhedlela," kusho uMkhize.
Ethula isabelo sika-R62.5 billion salo nyaka wezimali, uMkhize uthe bangaphezulu kuka-400 000 abasebenzi bezempilo asebegomele iCovid-19.
Usho lokhu nje umnyango wakhe uthole ukugxekwa izolo ngokungahleleki kohlelo lokugoma njengoba abasebenzi bezempilo bebethi babuyiselwa emuva sebefikile ezibhedlela abebethole izimemo zokuthi bayogoma kuzo.
E-Charlotte Maxeke, eGauteng, naseNetcare St Augustines abezempilo bebeme olayini abade belinde ukugoma, bebengatshelwanga ukuthi bazogoma ngasikhathi sini okuholele ekutheni kube nolayini omude nokushoda kwemigomo.
INehawu iwugxekile umnyango ngokungahleleki kwalolu hlelo, yathi bekungamele umemezele ukuqala kwesigaba sesibili sokugoma ekubeni ungakakulungeli ukusiqala.
UNksz Phumla Williams, okhulumela uhulumeni, uthe uhulumeni kulesi sigaba ubambisene nezinhlaka eziningi ngakho ukulungele ukusiqala lesi sigaba okuzobe kunezikhungo ezingu-3 000 zokugoma.
USolwazi Jerry Mphahlele weSouth African Medical Research Council, obuye abe yilungu lekomiti eleluleka ongqongqoshe abebhekele iCorona kuleli, uthe ayikho indlela yokugwema isivuvu sesithathu kodwa umphakathi ungakwazi ukwenza izaba zokuthi singasheshi sifike ngokulandela imigomo ebekiwe.