Ayazwakala amandla eGolf GTI TCR
NGIYAZI ukuthi abaningi uma bebona uGTI balindele ukufunda ngeVW Golf 8 GTI kodwa ngebhadi ayikaqali ukudayisa yize isikhona eNingizimu Afrika.
AbakwaVolkswagen eNingizimu Afrika bathi basalindele ukuthi kwande isitokwe ngoba ukukhiqizwa kwayo kuphazamisekile ngenxa yezimo ezahlukene. Ngesikhathi isalindiwe, iGolf 7 GTI ivaleliswe ngenothi eliphezulu ngokwethulwa kweGTI TCR, osungayithola iyisekeni ngenxa yokuthi idayise yaphela kwazise kulethwe kuphela angu-300 eNingizimu Afrika.
Ngaphakathi kwi-dashboard iqoshiwe ukuthi ngeyesingaki njengale ebesihamba ngayo yona okungeyokugcina ngci, ngoba ingeka-300. YiGolf 7 GTI oyaziyo kepha ishuniwe ukuze yehluke. Phakathi kwezinye zezinto ehluke ngazo wukuthi ifika iphelele akukho okumele ukwengeze njengezinye izimoto zakwaVW.
Izihlalo ngaphakathi kungathi ziyisikoshi zabe seziqoshwa GTI. Kune-composition media radio okwazi ukuxhuma kuyo iselula nge-apple carplay okanye nge-bluetooth ukudlala umsakazo nokunye. Ine-active info display, panoramic sunroof, cruise control nama-sensor ngaphambili nangemuva.
Ngaphandle inamaLED headlights, amarimu angu-19 inch yabe isiqoshwa noTCR ezansi esicabheni sangemuva. Injini ingenye yezinto eziyenza yehluke kuneGolf GTI ejwayelekile ngenxa yokuthi inamandla engeziwe. Ingu-2.0 litre turbo kaphethroli kodwa ifuqa amandla angu-213 kW ne-torque engu-380Nm no-gearbox oyi-6 speed DSG. Isuka ku-0 iye ku-100km/h ngemizuzwana engu-5.6 kanti ijubane elikhulu ngu-264km/h.
Ifika ne-adaptive chassis control eyenza ukuthi uyikhethe ukuthi ufuna ihambe kanjani. Amandla ayo ayezwakala ukuthi athe xaxa futhi amasondo anamathele emgwaqeni kanti nendlela ejika ngayo amakhona iseqophelweni eliphezulu yize bengingathanda isiteringi sibe nesisindo. Iyaziwa iGTI ngokuba yiVrr Pha futhi nezinqawe ngemuva kule zikhipha lowo msindo.
IGolf GTI yintandokazi yemoto eNingizimu Afrika futhi uma iGolf 7 ivaleliswe ngeqophelo eliphezulu kanje, kusho ukuthi singalindela lukhulu kwiGolf 8 GTI.
Intengo
R687 200
Ifika ne-service plan yeminyaka emihlanu noma u-90 000km ne-warranty yeminyaka emithathu noma u-120 000km.