I-BMW X6 M ingqovungqovu egqamile
IZIMOTO eziphakeme sikhuluma ngazo mihla namalanga kodwa iBMW X6 M Competition akuyona nje ejwayelekile ngenxa yokuthi inamandla ababazekayo.
I-BMW X6 M Competition yingqovungqovu yeSport Activity Coupe (SAC) engagabile kuphela ngobuhle kodwa ngaphansi kwebhonethi kuthukuswe injini egabe ngamandla.
Ingu-4.4 litre V8 turbo ekhafula u-460kW ne-torque engu-750Nm. U-gearbox ozishintshayo oyi-8 speed uthumela amandla kuwo womane amasondo kodwa kakhulu kwawangemuva nokuyenza iqhashe ihlale ku-100km/h ngemizuzwana engu3.8 nejubane elikhulu elingu290km/h.
Yize inkulu kodwa ihamba samoto encane ngoba inamathele emgwaqeni kwazise ine-Active M Differential, isiteringi sijika kalula futhi uma unganakile ubona isondo seligxoba ulayini ohlukanisa imizila. Okuhle kodwa wukuthi uyakwazi ukubona kwi-digital instrument cluster ukuthi ikuphi nomzila.
Izinqawe ngemuva ungathi kuduma izulu futhi kunebhathini lokuzehlisa ukuduma uma uthanda, ikakhulu uma ufuna ukuzihambela nje edolobheni kwazise akusiyo kuphela imoto oyikhipha ngoba nakhu ufuna isivinini.
Emgwaqeni ovulekile ithule ngaphandle komsinjwana omncane womoya, amabhampa uzowezwa kodwa hhayi ngendlela engabekezeleki.
Uyayisetha ukuthi u-suspension ubenjani nesiteringi.
Uyifaka kwi-adaptive cruise control izihambele ibhreke uma kunemoto futhi iyakwazi nokuzihlela emzileni ngokuzijika isiteringi kodwa ifuna usibambe.
Wena njengomshayeli usuke uhleli esihlalweni sesikhumba esigijima izitishi. Ezangaphambili ziyakwazi ukuphinde zishise. Kune-touch screen infotainment system okuyilapho ubona khona yonke imininingwane yemoto. Udlala umsakazo, uxhume iselula ngeApple CarPlay/Android Auto, ibona ingaphandle kumakhamera nokunye.
Ngemuva abagibeli banesikhala esanele sokuhlala kodwa kumele ubheke ikhanda uma ungena ngenxa yokhakhayi oluyisibaca. Baphinde babe nama-screen okuchitha isizungu. Ngenxa yokuba yisibaca kokhakhayi, isikhala ebhuthini asikho sikhulu futhi kunesondo elincane eliyisipele.
Ngaphandle iyabukeka futhi uma iqhamuka iyagqama. Omlandelayo uthi ekubona esibukweni ebe ekunika indlela. Inamaair intakes amakhulu, iBMW Laser light, amarimu angu-21 inch ngaphambili no-22 inch ngemuva ne-spoiler ngemuva.
I-X6 M yimoto egqamayo okungaba yimoto yakho yosuku nosuku nokuthi uma ufuna amandla usheshe uwathole.
Intengo - R2 856 100 Ifika neMotorplan maintenance contract yeminyaka emihlanu noma u-100 000km