Zimqoka izigcawu ngolwesithembu kwabesifazane
IQUBUKE kufanele imvunge ngesiphakamiso sokuthi nabesifazane babe nesithembu njengoba kucutshungulwa umthetho olawula imishado iMarriages Act, ukuze uvikele wonke umuntu ngokulinganayo.
UMnyango wezaseKhaya usuveze ukuthi uhlele izigcawu ezivulelekile lapho kuzolalelwa khona imibono yabantu ngalolu daba. Isithembu yinto engahlahlisi amehlo eNingizimu Afrika, ngoba sivumelekile kodwa okuvuse imvunge wukuthi sidlange kwabesilisa.
Kanjalo nezigcawu zokudingida lesi sihloko zizobe zingaqali njengoba zake zaba khona ngo-2019 kuya ku-2020. Kulezi zigcawu ezedlule kwehlule imibono, abamasiko babesichitha isithembu kwabesifazane, abamabandla besichitha kubo bonke ubulili kanti izishoshovu zamalungelo okulingana kobulili zithi masigunyazwe kubo bonke ubulili isithembu.
Nasezinkundleni zokuxhumana ibuvutha inkulumompikiswano ngalolu daba. Okususe le mvunge wukuthi kusuke kwacaca ukuthi iMarriages Act, kayibhekeleli ngokulinganayo wonke umuntu ngokwesimiso soMthethosisekelo wezwe ogcizelela ukuthi wonke umuntu ezweni unamalungelo alinganayo.
Uma silandela ngokweqiniso isimiso soMthethosisekelo wezwe, kusho ukuthi uma owesilisa ekwazi ukuba nesithembu kanjalo nowobunye ubulili kumele avumeleke ukwenza kanjalo ukuze kugcwaliseke ukulingana kubo bonke abantu, kungabukeki sengathi kukhona ubulili obunamandla kunobunye.
Kulolu daba lwesithembu abamasiko bathi isithembu sifanele owesilisa kuphela ngoba uma nowesifazane esevumeleka ukuba naso lokho kungadala inkinga ngendlela umndeni ohleleka ngayo. Ngamaphuzu abalulekile wonke lawa abekwa ngabahambisana nabaphikisana nalesi siphakamiso.
Yingakho kuzobaluleka ukuthi izinhlaka zonke zomphakathi ziphume ngobuningi ukuya kulezi zigcawu, kumeleleke zonke izinhlangothi nezinhlaka ukuze abashaya nabathuthukisa imithetho bezokwazi ukuthatha isinqumo esifanele.