IChiefs izokubeka eceleni ukuboza ibheke koweCaf
UZOYIKHOHLWA efile isizini ka-2020/21, uGavin Hunt, oqeqesha iKaizer Chiefs ephinde yahluleka ukuqoqa amaphuzu aphelele, ibambana neSwallows ngo-1-1 emdlalweni weDStv Premiership eFNB Stadium ngoLwesithathu.
Ebuzwa lo mqeqeshi ukuthi kumphatha kanjani ukugxekwa ezinkundleni zokuxhumana ngenxa yokungenzi kahle kwaMakhosi, uthe: "Kangikho ezinkundleni zokuxhumana, angazi ukuthi kwenzakani khona.
“Mayelana nemiphumela, eminyakeni ewu-27 ngisebholeni, lo nyaka yiwona obe nzima ukuyedlula yonke.
“Uma ulazi ibhola, uzobona ukuthi kuningi okumele sikwenze. Kunzima kunjalo, sizoqhubeka nokusebenza kanzima nsuku zonke. Kuzoze kulunge.“
IChiefs isalelwe yimidlalo emithathu kuphela ukugwema okwenzeka ngesizini ka-2018/19, ihluleka ukungena kwiTop 8.
Njengamanje isendaweni yeshumi, ngamaphuzu awu-30.
KoweSwallows bekungowesine kulandelana ihluleka wukuqoqa amaphuzu aphelele.
Ukunqoba bekuzogqugquzela abadlali bayo ngaphambi kowe-quarterfinal yeChampions League, ezobhekana kuyo neSimba yaseTanzania.
Lo mdlalo uqala ngo-3 ntambama, kusasa, eFNB Stadium.
I-The Kings, eqeqeshwa, nguDidier Gomes, itheleke kuleli ngoLwesibili.
UHunt kuzomele aqhamuke namaqhinga aphusile ngokushesha kwazise izitha zabo zikubonile ukubhacaza kwabo.
Mayelana nomdlalo wakusasa, uHunt uthe: “Sengike ngayibuka imidlalo yayo embalwa eqoshiwe. Sizoqhubeka nokwenza lokho. Kuzomele sibuyisele imiqondo yethu ngokushesha emdlalweni weChampions League.
Sisazobona ukuthi yibaphi abadlali abazobe bekhona kulo mdlalo.
“Siyakholelwa kulabo abazodlala ukuthi bazowenza ngendlela umsebenzi. Kakusasizi ukubambelela emiphumeleni edlule. Kuzomele sivuke sizithintithe.”
UHunt ube esebalisa ngokulimala kwabadlali bakhe. KoweSwallows kulimale uKearyn Baccus. Ulandela onozinti u-Itumeleng Khune noDaniel Akpeyi, Eric Matoho, Lebohang Lesako noKhama Billiat.
Emdlalweni wakusasa iChiefs kuzomele izibambe ziqine kwiSimba eqede kwiGroup A iqhwakele.
Ilele kweyokuqala kwiTanzanian Premier League, ngamaphuzu awu-61, emidlalweni ewu-25.
Sekuphele emidlalo emihlanu ilandelana idedela induku. Yagcina ukushaywa yi-Al Ahly ngenyanga edlule. Abafana basePhefeni baqede kweyesibili kwiGroup C.
IMamelodi Sundowns izovakashela i-Al Ahly kuma-quarterfinal eChampions League khona kusasa e-Al Salam Stadium kusasa ngo-9 ebusuku. Elinye iqembu lakuleli elisekhona emidlalweni yeCaf, yi-Orlando Pirates ezodlala umlenze wokuqala wama-quarterfinal ibhekene neRaja Casablanca yaseMorocco, ngeSonto ngo-3 ntambama e-Orlando Stadium. Umlenze wesibili uzokuba sekuhambeni ngoMeyi 23.
Lokhu kusho ukuthi kulesi sigaba kungaba wukuphela kohambo lwamaqembu akuleli kule miqhudelwano noma kubekhona adlulela phambili.
ISundowns inethuba lokudlala kwiChampions League nangesizini ezayo njengoba ibonakala ibheke ekunqobeni isicoco seDStv Premiership.
Elinye iqembu elizokwazi ukumela elakuleli ngelizothola indawo yesibili kwi-log.
IChiefs ayibalwa kulawo maqembu njengoba ingekho ngisho kwiTop 8 kanti iPirates ingakwazi ukuthola indawo kwiConfederation ngokuqeda endaweni yesithathu kwi-log okanye igudluze AmaZulu FC kweyesibili, bese idlala