OwoSuthu ufuna ukuheha umqeqeshi weBafana
UNOZINTI waMaZulu, uVeli
Mothwa, uzimisele ngokuqhubeka nokusebenza ngokuzimisela ukuze ezoheha iso lomqeqeshi omusha weBafana Bafana, uHugo Broos.
UMothwa (30) othathwe nguBenni McCarthy kwiChippa United, uqhubekile nokuzuza izithelo zokusebenza kanzima, eklonyeliswa ngendondo yokuba ngumdlali ovelele kwiDStv Premiership ngoMashi no-Ephreli.
Akukapheli sikhathi esingakanani ebizelwe okokuqala eqenjini lesizwe ebelidlala neGhana neSudan kweyokuhlungela i-Africa Cup of Nations (Afcon) ngaphansi kobengumqeqeshi, uMolefi Ntseki.
UMothwa uthe wehluleka nawukukhuluma ngenxa yenjabulo. Uthe kungokokuqala ezizwa ekhululekile. Ukunqoba le ndondo kusho ukuza kokukhulu.
"Ngabizelwa eqenjini lesizwe ngoba ngenza kahle. Namanje ngisazoqhubeka nokuzikhandla ukuze ngizothola indawo kwiBafana. Ngibiziwe noma ngingabizwanga kwelesizwe, ngizoqhubeka nokubeka phambili iqembu lami, AmaZulu,“kusho uMothwa.
UMothwa, osevimbele uSuthu emidlalweni ewu-23, akawuvalanga umlomo ngolwazi aluthola kubaqeqeshi bakhe, uMcCarthy nomqeqeshi wonozinti uMoeneeb Josephs.
"(UJosephs) Uwumqeqeshi onomusa futhi ohlakaniphile. Maningi amaqhinga okuvimba awangeze kimina. Uhlale esigqugquzela ukuthi sisebenze kanzima. Uhlale ekusho ukuthi lapha akekho unozinti ohamba phambili, bonke bayalingana. Okubalulekile wukusebenza kanzima.
"Mayelana noMcCarthy, ngiyambongela ngomklomelo(womqeqeshi wenyanga ovelele) awutholile. Ukuhlabana ngawo kulandelana, kuwubufakazi bokuthi uwumqeqeshi wezinga eliphezulu. Ukube kuya ngami ngabe ekupheleni kwesizini ubezoqokwa abe ngumqeqeshi obaqwaqwade bonke emakhanda".
UMothwa, oke waba semabhukwini eBaroka, ube esedalula afuna ukukuzuza.
"Ngifuna ukunqoba izinto engizozijabulela nozakwethu. Okuhamba phambili wukunqoba naMaZulu isicoco seligi, wukuba wumdlali ovelele ekupheleni kwemdlalo, wukuphakamisa nozakwethu nezinye izinkomishi ezifana neMTN 8 neNedbank Cup. Kuningi engikufisela iqembu, kungaphela usuku ngikubala,“kusho uMothwa.
AmaZulu azobuyela ensimini ngoMeyi 27 eyobhekana ne-Orlando Pirates, e-Orlando Stadium.