Seluphumile usuku lwemidlalo yokuhlunga yeMotsepe
IZODLALELWA eMpumalanga imidlalo kazwelonke ezokhipha amaqembu amabili, e-ABC Motsepe League, azonyukela kwiGladAfrica Championship.
UKwenzokwakhe Ngwenya ongusihlalo weSouth African Football Association (Safa), KwaZulu-Natal, wazise Isolezwe ukuthi le midlalo izodlalelwa eMbombela, eMpumalanga, ngoJulayi 9-14.
Kuzocaca kusasa ukuthi yiliphi iqembu phakathi koMvoti waseGreytown neReal Kings yaseHammarsdale, eThekwini, elizomela lesi sifundazwe eMbombela.
La maqembu azodlala kowomlenze wesibili kusasa ngo-3 ntambama eKing Zwelithini Stadium.
Kowokuqala obuseKing Edward Stadium, eGreytown ngoLwesithathu, kayikho evume ukugoba uphondo, zibambana ngo 0-0.
Kuzokhumbuleka ukuthi uMvoti oqeqeshwa uDoctor Mkhonza, yiwo obumele iKwaZulu-Natal, kweyokuhlunga ngesizini edlule. Bese kungokwesibili leli qembu liya kule midlalo lifika lihluleka.
UNgwenya uveze ukuthi okokuqala emlandweni weMotsepe, iqembu elizonqoba kusasa, lizoklonyeliswa ngenkomishi nezindondo zegolide. Elihluliwe lizogoduka nomthoba nhliziyo wezindondo zesiliva.
"Sithathe isinqumo sokwenza lokhu ngenhloso yokugqugquzela amaqembu, lokhu sesizokwenza minyaka yonke.
“Okunye okuthokozisayo ukuthi uMnyango wezeMidlalo usukuqinisekisile ukuthi uzolixhasa ngokuthile iqembu elizonqoba kusasa. Uzolenzela ikhempu ezoba yisonto ngaphambi kokuqala kwemidlalo yokuhlunga. Uzobuye ulikhokhele nezindleko zokudla.
“Kuyisifiso sethu ukuthi kule sizini sibe neqembu elinyukela kwiGladAfrica. Siqede imidlalo yeligi ngokushesha kunazo zonke izifundazwe ngoba sifuna ukulinika isikhathi esanele iqembu eliya eMbombela,” kusho uNgwenya.
Kweyokuhlunga yangesizini edlule kwagcina kunyuke iPretoria Callies yaseGauteng neBizana Pondo Chiefs yaseEastern Cape. IPondo Chiefs isidliwe yizembe kulesi sigaba.
KwaZulu-Natal kwagcina ngoThongathi olwanyuka ngeka-2016/17.
NeLipompo kulindeleke iqede imidlalo yayo kule mpelasonto.
Kowamanqamu kuzodlala iThe Dolphins esonge ku-Stream A ngamaphuzu awu-34 neMagesi eqede ku-Stream B ngawu-35.
NaseNorthern Cape sezihuba sakusha.
Kule mpelasonto amaqembu azodlala eyokugcina yeligi bese kusala umdlalo ozokhipha elizomela isifundazwe.
Ku-Stream A ziholwa iHungry Lion ngamaphuzu awu-45, ku-Stream B kube iNC Professionals ngawu-41. IWestern Cape iyona esilele emuva. Isadlale imidlalo emine.