Yobe nina beSilo, masehlise imimoya senzele isizukulwane sethu!
SINGABAHLELI bamaphephandaba Isolezwe nePost, sibunjwe wumbono wokuthi sikhuze izibhelu eziqubuke emiphakathini yethu eseziholele ekutheni kuchitheke igazi, kuphume nemiphefumulo.
Okusikhathaza kakhulu ngukuthi lezi zibhelu seziqubule nesihlava sokucwasana ngokobuhlanga KwaZulu-Natal.
Siyabazi futhi siyabuqonda ubuhlungu nokudinwa kubantu bakithi ngesimo sezwe. Impilo isimile kwabanye kanti sekukhona nemiphefumulo ephumile.Njengoba sikhuza lolu dlame, kubalulekile ukuveza ukuthi kube yidlanzana eliphehle lolu dweshu oselumoshe impilo yabantu nengqalasizinda. Baningi abantu baseNingizimu Afrika abangazange babe yingxenye yodlame nokuzitapela ezitolo, nesibancomayo ngokungabi yingxenye yalokhu.
Akumele sivumele idlanzana ukuba lisihlukanise ngokobuhlanga ezweni lethu okumele sikhululeke sonke kulo ngoba ukuvumela leli dlanzana kusho ukucekela phansi izithelo zabalwa kanzima belwela inkululeko yawo wonke umuntu eNingizimu Afrika.
Masikhumbule ukuthi kule minyaka eyedlule sikwazile ukuhlalisana. Yebo, bekuba khona izikhathi lapho bekuba nokushayisana kepha besihlalisana kunjalo. Pho manje sekwenzenjani?
Sikwazile ukuphuma ezimeni ezishubile ngokuthi sikhethe ukuthula noxolo. Yikhona lokhu esikunxusayo emiphakathini, yabamnyama neyabomdabu baseNdiya abaseNingizimu Afrika, ukuba siphilisane futhi sihloniphane.
Makungabi khona obukela omunye phansi nozibona engcono kunomunye ngoba uMthethosisekelo usibumba usenze silingane sonke.
UMthethosisekelo kawuboni bala, kawuboni minyaka, kawuboni sizwe, kawuboni zinga, ngakho nathi kumele sibukane ngamehlo awo uMthethosisekelo.
Sicela neziphathimandla zezomthetho kuleli ukuba ziphenye futhi zibophe ngokushesha abenzi bobubi bonke abaphule umthetho.
Sicela kube nokuthula emiphakathini yethu. Sekuyisikhathi sokuthi sonke ke sibe nomzuzu ngamunye ngamunye sininge sijule ngezibhelu eziqubukile.
Masikhumbule ukuthi siyadingana sonke, ikakhulukazi kulesi sikhathi. Sidinga ukwakha kabusha, hhayi nje ukwenzela thina kepha abantwana bethu nesizukulwane esizayo. Ubuntu mabande kubo bonke abantu baseNingizimu Afrika!
~KIKI NTULI no-AAKASH BRAMDEO